Elorda halqy men qonaqtary Astananyń týǵan kúnin toılaýda - FOTOREPORTAJ
ASTANA. QazAqparat - Astananyń 16 jyldyǵy keńinen toılanyp jatyr. Qalanyń ár buryshynda ásem án áýelep, kúı qalyqtaǵan. Merekeni atap ótýge aýyl-aımaq, ózge óńirlerden kelgen aǵaıynda esep joq. Osylaısha elorda merekesi el bolyp merekelenýde.
Bul kúni elordanyń ár jerinde áralýan sharalar ótkizildi. Qaı jaqqa bas suqsań da, merekelik dýmanǵa tap bolasyń. Atap aıtqanda, «Han shatyr» mańynda «Myńjyldyqtar toǵysyndaǵy Astana» kóshpendiler festıvali qanat jaıdy, «Astana Shattyq» avtokerýeni qala mańyndaǵy kentterdi aralap, shettegi halyqty merekeden shet qaldyrmady. Al tamaqqa talǵampaz jandar úshin aspazdar festıvali ótti. Jalyndaǵan jastar «International Street Dance Session in Astana» atty kóshe bıi festıvalin tamashalap, bir serpilip qaldy. Mine, osy syndy merekelik sharalar qalanyń shyraıyn keltirdi.
Qalalyq saıabaqtarda da serýen qurǵandar kóp. Elordanyń 4 iri parkinde teatrlandyrylǵan qoıylymdar kórsetilip, sporttyq saıystar uıymdastyrylyp, barlyq ulttyń mádenıetine tereń boılaýǵa jaǵdaı jasaldy. Odan bólek qaladaǵy tearlarda jańa qoıylymdardyń tusaýy kesilip, birqatar kontserttik baǵdarlamalar ótip jatyr. Jalpy, qala kúnin merekeleý aıasyndaǵy is-sharalarǵa 20 myńnan astam adam qatysqan. Saltanatty sharalar «Qazaq Eli» monýmentiniń aldyndaǵy nurshashýmen aıaqtaldy. Sóıtip Astananyń túngi aspanynda bir mezette san myńdaǵan ot jaǵylyp, Qazaqstannyń ózge óńirlerine salıýtpen sálem joldaǵandaı boldy!
