Elorda halqynyń sany 1,5 mln-nan asty

ASTANA. KAZINFORM – Ulttyq statıstıka bıýrosynyń málimetine sáıkes Astana qalasynyń halyq sany 1 502 102 adamǵa jetti.

2024 jylǵy 1 qazandaǵy jaǵdaı boıynsha elordada 1 502 102 adam ómir súrip jatyr, al 1 qyrkúıektegi derekterge sáıkes, elordada 1 490 740 adam bolǵan. Osylaısha, bir aıda qala jurty 12 myńǵa jýyq adamǵa artyp otyr. Ósý qarqyny 5,03 paıyzǵa jetti.

Ótken jyly 1 qazanda elordada 1 409 497 adam sanaqqa alynǵan. Al jyl basynda bul kórsetkish 1 430 105 adamǵa deıin ósti.

Almaty qalasyna kelsek, bıyl 1 qazanda halyq sany 2 275 541 adamǵa jetti. Bir jyl buryn bul megapolıste 2 211 198 adam ómir súrgen.

Ulttyq bıýronyń 1 qazandaǵy statıstıkasy boıynsha Qazaqstan halqynyń sany – 20 223 218 adam, ósý qarqyny 0,95 paıyzǵa jetti. Onyń ishinde 12 704 977 adam qalada turady jáne 7 518 241 adam aýylda mekendeıdi.

Eske sala ketsek, bıyl mamyrdaǵy statıstıka boıynsha Qazaqstanda halyq sany 20 095 963 adamǵa jetken edi.