Elorda eriktileri múgedekter birlestiginiń aýlasynda senbilik ótkizdi
Senbilik Táýelsizdiktiń 30 jyldyǵy qarsańynda qolǵa alynǵan «30 ıgi is» qaı̆yrymdy sharalar sherýniń aıasynda uıymdastyryldy. Oǵan uıytqy bolǵan - Nur-Sultan qalasynyń Jastar saıasaty máseleleri basqarmasy men «Astana jastary» mekemesi.
«DOS» táýelsiz ómir» ortalyǵynyń aýmaǵyna jınalǵan 15-ke jýyq erikti aýmaqta sanıtarlyq tazalaý jumystaryn júrgizip, aǵashtardy áktep, qoqys pen qar qaldyqtaryn shyǵardy.
«Búgin múgedekter qoǵamdyq birlestigine keldik. Aýmaqty abattandyryp, qardan tazartýǵa, qoqys shyǵarýǵa kómektesemiz. Qystan qalǵan laısań aýlalardyń surqyn qashyryp, júrip-turýǵa qolaısyz jaǵdaı týǵyzady. Sondyqtan aýmaqty tazartý qajet. Biz búgingi sharaǵa qalamyzdyń kelbetin kórneki qalpynda saqtaý úshin ún qosqanymyz jón dep sheshtik», - deıdi «Astana jastary» mekemesiniń eriktisi Oljas Amangeldi.
Oljas turaqty jumysy bar bolsa da, volonterlikten qol úzbeıdi. Jumystan qoly bosaı qalsa, qaıyrymdylyq sharalaryna úles qosýdy ádetke aınaldyrǵan.
«Ýnıversıtet bitirgennen keıin jumysqa ornalastym. Bos ýaqytymdy ózime de ózgelerge de paıdaly uıymdastyrý úshin eriktilermen baılanysymdy úzgen joqpyn. Esesine osy ortadan jańa dostar taptym. San túrli taǵdyrdy kórip, ómirge qajet tájirıbe jınaqtap jatyrmyz. Bir jaǵynan bolmystyń jaqsy qalyptasýyna da erktiliktiń áseri úlken. Neǵurlym jaqsylyqty kóp jasasańyz, jan-dúnıeńiz soǵurlym taza bolady», - deıdi elordalyq erikti.
Oljas Amangeldi qaıyrymdylyq jasaı júrip keıbir muqtaj jandarmen týysqandaı jaqyn aralasyp ketkenin aıtady.
«Qys boıy bir top eriktiler jalǵyzbasty zeınetkerlerdiń, múmkindigi shekteýli adamdardyń aýlalaryn qardan arshyp berip otyrdyq. Tipti qorshaǵan ortaǵa da qamqorlyq tanytyp, qustarǵa uıa jasap ildik, janýarlarǵa azyq jetkizip berdik. Bir jalǵyzbasty ájege kómektese júrip týysqanyndaı bolyp kettim. Ol kisi de men úshin týǵan ájemdeı qadirli adamǵa aınaldy. Árqashan kómekteskim kelip turady», - deıdi erikti jas.
