Elorda emhanalarynda dene temperatýrasyn ólsheıtin qurylǵy ornatyldy
NUR-SULTAN. QazAqparat – Emhanalarǵa kelýshilerdiń dene temperatýrasy avtomatty túrde ólshenip, koronavırýs belgilerin biledi, dep habarlaıdy elorda ákimdiginiń resmı saıty.
Qalalyq emhanalarda dene temperatýrasyn ólsheıtin teplovızorlar paıda boldy. Temperatýrany avtomaty túrde ólsheýge arnalǵan qurylǵy kire beriste ornatylady. Eger kelýshilerdiń nemese dárigerlerdiń bireýinde aýrýdyń alǵashqy belgileri bolsa, qurylǵy birden dabyl qaǵady.
Qalada jeke demeýshiler esebinen, atap aıtqanda kásipker Nurlan Smaǵulovtyń qoldaýymen dene temperatýrasyn baqylaıtyn alty qurylǵy ornatyldy. Elorda ákimdigi bildirgen qoldaýy úshin alǵys bildiredi.
«Búgin kúndiz temperatýrasy 37 gradýstan joǵary bir kelýshi boldy. Sol sátte qurylǵy birden belgi berdi. Dárigerler ony respıratorlyq aýrý belgileri bar patsıentterdi qabyldaıtyn arnaıy kabınet arqyly ótkizdi. Barlyq qajetti is-qımyldar men tekserý jumystary algorıtm boıynsha oryndaldy. Sondyqtan bul shlıýz óte yńǵaıly. Emhana qyzmetkerleri de teplovızor arqyly tekseristen ótetinin aıta ketkim keledi», - deıdi №5 qalalyq emhana basshysy Altynshash Tabýldına.
Aıta keteıik, elordanyń medıtsına mekemelerinde jáne adam kóp jınalatyn oryndarda dezınfektsııalyq tonnelder ornatylyp jatyr.
