Elorda emhanalarynda ashyq esik kúnderi ótýde
ASTANA. QazAqparat - 1 qazanda búkil álemde Halyqaralyq qarttar kúni atalyp ótedi. Astanada Qarttar kúnine oraı jyl saıyn birqatar merekelik sharalar uıymdastyrylady, dep habarlady astana.gov.kz.
Osyǵan oraı 20 qyrkúıekten 1 qazanǵa deıingi aralyqta elordanyń barlyq emhanalarynda qarttarǵa arnalǵan ashyq esik kúnderi ótýde. Egde jastaǵy elorda turǵyndary tolyq medıtsınalyq tekseristen ótýge múmkindik alady. Ashyq esik kúnderi kúndelikti saǵat 9:00-18:00 deıin ótedi.
№10 qalalyq emhanada 21-30 qyrkúıek aralyǵynda ashyq esik kúni uıymdastyrylýda. №7 qalalyq emhana 26 qyrkúıekte kelýshilerdi qabyldady. 28 qyrkúıekte «Demeý» jáne «Kırov» otbasy dárigerlik ambýlatorııada qarttarǵa arnalǵan ashyq esik kúnderi ótedi. Al, 29 qyrkúıek kúni №2, 3, 6, 8 qalalyq emhanalarynyń jáne «Nıet» otbasy densaýlyq ortalyǵynyń mamandarynan keńes alýǵa bolady.
№5 qalalyq emhanada jáne «Shapaǵat» otbasy densaýlyq ortalyǵynda 30 qyrkúıekte qabyldaý saǵattary ótedi. 1 qazan kúni №1, 4, 9 qalalyq emhanalary men «Salaýatty Astana» JShS jáne "Dostyq" otbasy densaýlyq ortalyǵynda ashyq esik kúnderi ótedi.
Shara aıasynda dárigerler júrekke jáne ókpege aýskýltatsııa ádisin paıdalanady, arterıaldyq qysym, qan qysymy men qandaǵy holesterın deńgeıin ólsheıdi.
Aıta keteıik, Halyqaralyq qarttar kúni BUU Bas Assambleıasynyń 1990 jylǵy jeltoqsannyń 14-indegi qaýlysy negizinde jyl saıyn dástúrli túrde qazannyń 1-inde atalyp ótýde.
