Elorda EQYU aıasynda ótetin sharalar boıynsha keletin memleketterdiń delegatsııalaryn qabyldaýǵa daıyn bolýy qajet - Kólik jáne kommýnıkatsııa vıtse-mınıstri
áýirdiń 27-si. QazAqparat /Aıdar Ospanalıev/ - Búgin Kólik jáne kommýnıkatsııa mınıstrliginde vıtse-mınıstr Azat Bekturovtyń basshylyǵymen Eýropadaǵy qaýipsizdik jáne yntymaqtastyq uıymynyń 18-shi ekonomıkalyq-ekologııalyq forýmyna ázirlik jáne ony ótkizý jónindegi jumys tobynyń otyrysy ótti,
dep habarlaıdy QazAqparat.
Onda atalmysh jıyndy uıymdastyrýǵa qatysty qalyptasyp otyrǵan máseleler men mınıstrliktiń óz mindetteri shegindegi daıyndyq máseleleri talqyǵa salyndy. A.Bekturovtyń sózine qaraǵanda, EQYU-nyń 18-shi ekonomıkalyq-ekologııalyq forýmyna ázirlik jáne ony ótkizý jónindegi jumys tobyn qurýǵa qatysty buıryqqa bıylǵy jyldyń basynda qol qoıylǵan. Qazaqstan EQYU-na tóraǵa, al Kólik jáne kommýnıkatsııa mınıstrligi atalmysh uıymnyń basty úsh baǵytynyń birine jaýapty organ. «Bıylǵy jyly atalmysh uıymǵa tóraǵalyq aıasynda birqatar sharalardyń uıymdastyrylǵaly otyrǵandyǵy málim. Olardyń biri EQYU-na múshe elderdiń Memleket basshylarynyń sammıti bolsa, ekinshisi atalmysh uıymǵa kiretin memleketterdiń Syrtqy ister mınıstrleriniń keńesi. Al mamyrdyń 24-i men 27-si aralyǵynda Pragada EQYU-nyń 18-shi ekonomıkalyq-ekologııalyq forýmy ótedi. Atalmysh sharaǵa qatysatyn qazaqstandyq delegatsııany Kólik jáne kommýnıkatsııa mınıstri jetekshilik etedi, ıaǵnı biz osy sharaǵa tyńǵylyqty daıyndalýymyz qajet», dep atap kórsetti vıtse-mınıstr.
Osyǵan qaraı májilis barysynda ekonomıkalyq-ekologııalyq forým men elde ótetin jıyndarǵa daıyndyq barysy jóninde mınıstrliktiń basqarmalary men bólim basshylary baıandama jasady. Óz kezeginde A.Bekturov basqarma jáne bólim basshylaryna elorda astanasynyń áýejaıy álemniń 53 memleketinen keletin qonaqtardy kútip alýǵa daıyn bolýy qajettigin, sonymen qatar qonaqtardy qarsy alý sharalarynyń da joǵary deńgeıde atqarylýy qajettigin atap kórsetti. Osy baǵyttaǵy jumystardy jetildirý úshin ol mınıstrlik ókilderine jergilikti ákimshilik pen ózge de quzyrly organ ókilderimen tyǵyz baılanysty belsendi jumys atqarýdy tapsyrdy.
