Elorda ekonomıkasyna 7 aıda 1,2 trln teńge ınvestıtsııa tartyldy
ASTANA. KAZINFORM – Prezıdent joldaýyndaǵy tapsyrmalardy júzege asyrý aıasynda elordada ekonomıkalyq ósim qarqyn aldy. Bıylǵy 7 aıda Astanaǵa tartylǵan ınvestıtsııa kólemi 42%-ǵa artyp, 1,2 trln teńgege jetti, dep habarlaıdy elorda ákimdiginiń resmı saıty.
Prezıdent Qasym-Jomart Toqaev óz Joldaýynda ekonomıkalyq ósýdiń negizgi draıverlerin nyǵaıtýǵa erekshe nazar aýdardy. Olardyń arasynda ınvestıtsııalar, ónerkásip jáne kásipkerlik mańyzdy oryn alady. Qalada ınvestıtsııalyq ahýaldy jaqsartý boıynsha júıeli jumys júrgizilip jatyr. Investorlar úshin qolaıly jaǵdaı jasaýǵa jáne jobalardy qoldaýǵa erekshe mán berilip otyr.
Bıyl 7 aıdyń qorytyndysy boıynsha Astana el ekonomıkasyna salynǵan ınvestıtsııa kólemi jaǵynan kósh bastady. Naqty ósim 42%-dy qurap, 1,2 trln teńgege jetti. Jeke ınvestıtsııalar 25,4%-ǵa ósip, 780 mlrd teńgeni qurady. Memleket basshysy óz Joldaýynda óńdeý ónerkásibiniń erekshe rólin atap ótti. Bul eksporttyq áleýetti qalyptastyratyn, jańa tehnologııalardy engizetin jáne sapaly jumys oryndaryn quratyn sala. 2024 jyly óńdeý ónerkásibi óndirisiniń ósimi 10%-dan asyp, 2,5 trln teńgege jetti. Bıyl óńdeý ónerkásibinde jańa óndiristerdi iske qosý esebinen kólemdi 7%-ǵa arttyrý josparlanyp otyr. Bul ósim 2,6 trln teńgege deıin jetedi. Astanadaǵy №1 Indýstrııalyq park ta turaqty ósim kórsetip, aıtarlyqtaı ınvestıtsııalar tartyp keledi.
Munda jalpy quny 336 mlrd teńgeden asatyn 139 joba ornalasqan. Olardyń ishinde 82 kásiporyn jumys istep tur. Al aldaǵy eki jyl ishinde taǵy 57 óndiris ashylmaq. 2025 jyly 43 mlrd teńgege 21 kásiporyndy iske qosý jáne 1,2 myń jumys ornyn qurý josparlanyp otyr. Birinshi parktiń tabysty tájirıbesin eskere otyryp, memlekettik-jekemenshik áriptestik tetigin paıdalana otyryp, № 2 Indýstrııalyq park jobasyn iske asyrý boıynsha jumys bastaldy. Onyń aýmaǵynda 500 mlrd teńgeden astam somaǵa 100-den astam jobany iske asyrý josparlanyp otyr. Bul 8 myńnan astam jumys ornyn qurýǵa múmkindik beredi. №1 Indýstrııalyq parktiń úsh jetekshi kásipornynyń alǵashqysy – «Kazakhstan Paramount Engineering». Ol – 2014 jyly qurylǵan, bronetehnıkany óndirisin jáne jaýyngerlik modýlder men elektrondyq júıelerdi shyǵaratyn kásiporyn.
Óndiristik aýdany – 13 500 sharshy metr, qýattylyǵy jylyna 360 MRAPavtomobıli, qyzmetkerler sany 350-ge jýyqtaıdy. Kásiporyn jobalarynyń qatarynda – jylyna 10 myń danaǵa deıin júk tehnıkasyn shyǵaratyn zaýyttyń qurylysy, qorǵanys jáne azamattyq maqsattaǵy elektrondyq ónimderdi óndirý, sondaı-aq artıllerııalyq oq-dárilerdi tolyq tsıkldi óndirýdi qurý boıynsha «ASPAN» jobasyn iske asyrý.
– Árbir adam ózine unaıtyn mamandyq tabýy kerek. Mamandyq suranysqa ıe bolsa, ol mamandy syılaıdy dep oılaımyn. Biz aǵam ekeýmiz bul zaýytta talaı jyldan beri elektrık bolyp jumys isteımiz jáne osyndaı aýqymdy óndiristiń bir bóligi bolǵanymyzǵa qýanyshtymyz, - dep atap ótti 4-razrıadtaǵy dánekerleýshi-elektrık Qosylbek Násiphan.
Ekinshisi – «Aromat» fabrıkasy. Ol – Ortalyq Azııadaǵy tolyq tsıkldi parfıýmerııa shyǵaratyn jalǵyz fabrıka. Óndiristik qýattylyq – jylyna 5 mln qutyǵa deıin jetedi. Ónimniń shamamen 90%-y TMD jáne Taıaý Shyǵys elderine eksporttalady. 2025 jyldyń kókteminde «VITTORIO» jáne «The Spirit of Kazakhstan» jańa jelileri iske qosyldy.
– Kóktemde biz Astana, Almaty qalalaryna, Ulytaý jáne Atyraý óńirlerine arnalǵan premıým jelisin shyǵardyq. Keıbir hosh ıisterdi Fleur Narcotiquepen Fleur de Santalsııaqty bestsellerlerdiń avtorlary – frantsýz parfıýmerleri Kventın Bısh pen Gael Montero ázirledi. Bizdiń ujymymyz tatý, 120 adam bir úlken otbasy sekildi. Qazir jumysshy mamandyqty tańdaýdyń eń qolaıly ýaqyty dep esepteımin. Memleket bizdi damýǵa jáne ósýge barlyq jaǵdaıdy jasap, belsendi qoldap otyr, - dedi óndiristik tseh bastyǵy Aıdyn Qaıyrjanov.
Úshinshisi – «Metal Former». Ol – «Jaıly mektep» ulttyq jobasyna qatysatyn qasbettik materıaldardy shyǵaratyn Qazaqstandaǵy alǵashqy kásiporyn. Negizgi baǵyt – ǵımarattardyń syrtqy jáne shatyr betterine arnalǵan qurylys materıaldaryn óndirý.
– Júrek kez kelgen jumysqa jaqyn bolýy kerek. Bir aı istep kórip, unamady dep basqa jumysqa aýysa bermeý kerek. Osylaı jyldar boıy júre berseń, óz isindi taba almaısyń. Jumysshy mamandyqtar jylynda árbir jumysshynyń eńbegin baǵalap, onyń damýy men kásibı ósýine jaǵdaı jasaý erekshe mańyzdy. Eldiń bolashaǵyn dál osy jumysshylar óz qoldarymen salady, - dedi kóp jyldyq tájirıbesi bar qurylysshy Arman Abırov.
Buǵan deıin arnaıy ekonomıkalyq aımaqtardy sheteldik kompanııalar basqarýy múmkin ekenin jazǵan bolatynbyz.