Elorda dúkenderinde qaýipti lımonad satylýda
Satylatyn tamaq ónimderiniń qaýipsizdigin baqylaý aıasynda departament ýlanýdyń aldyn alý maqsatynda turaqty túrde taratý jelisinen azyq-túlik jáne azyq-túlikke jatpaıtyn taýarlardy iriktep alady.
«Sonymen, «Grýzın syra kompanııasy» AQ óndirgen alkogolsiz, gazdalǵan «ARAGVI» lımonady, tarhýn jáne saperavı sýsyndarynyń quramynda natrıı benzoatynyń gıgıenalyq normadan asatyny anyqtaldy. Zerthanalyq zertteý nátıjesi boıynsha osy alkogolsiz sýsyndardaǵy natrıı benzoatynyń mólsheri - 152, 68 mg/kg-nan 163,53 mg/kg deıin. Al norma - 150 mg/kg» delingen habarlamada.
Natrıı benzoaty (E211) - taǵamdyq qospa, saqtaý merzimi men saqtaý merzimin ulǵaıtý maqsatynda taǵamdyq jáne azyq-túlikke jatpaıtyn ónimderdi, sonyń ishinde tátti gazdalǵan sýsyndardy óndirýde qoldanylatyn konservanttar tobyna jatady.
Sonymen qatar, natrıı benzoaty dámdi, tústi jaqsartady jáne eski ónimniń dámin «jańartýǵa» kómektesedi, bakterııalar men sańyraýqulaqtardy óltiretin antıbıotıkalyq qasıeti bar.
E211 konservanttary aǵzada jınalýǵa beıim, sondyqtan osy taǵamdyq qospasy bar ónimdi qalypty mólsherde ishý kerek. Sebebi, ol adamnyń densaýlyǵy men ál-aýqatyna áser ete alady.
«Natrıı benzoaty askorbın qyshqylymen árekettesip, DNQ qurylymyn buzatyn kantserogendi benzol túzetinin jáne de baýyr tsırrozy men qaterli isik aýrýyna, júıke júıesiniń buzylýyna sebep bolatynyn este ustaǵan abzal. Teri sezimtaldyǵymen nemese astma aýrýymen aýyratyn adamdarda E211 konservanttary aýrýdy órshitip, allergııalyq reaktsııa týǵyzýy múmkin. Qazirgi ýaqytta zań aıasynda saýda jelisin tekserý, anyqtalǵan qaýipti ónimderdi naryqtan shyǵarý jáne ákimshilik jaýapkershilikke tartý boıynsha sharalar qabyldanýda» dep málim etti departament.
Departament osy ónimderdi elorda dúkenderinen kórgen jaǵdaıda +7 (7172) 31-61-81 nómirine habarlasý kerektigin eske salady.