Elorda dárihanalarynda preparattyń shekti baǵasyn kórsetetin QR-kod ornatyldy
NUR-SULTAN. QazAqparat – Elorda dárihanalarynda áleýmettik mańyzy bar preparattardyń shekti baǵasyn bilýge bolatyn QR-kodtar ornatyldy, dep habarlaıdy QazAqparat tilshisi.
Bul týraly QR Sybaılas jemqorlyqqa qarsy is-qımyl agenttiginiń elordalyq departamentindegi preventsııa jáne parasattylyq basqarmasynyń basshysy Marat Haırýllın aıtyp berdi.
«Astana – adaldyq alańy» jobalyq keńsesiniń usynysymen Nur-Sultan qalasynyń dárihanalarynda preparattyń shekti baǵasy týraly QR-kod ornatyldy. ıAǵnı, halyq dárilik preparattardyń shekti baǵasyn kórip, dárihana baǵasymen salystyra alady. Munda ákimdiktermen birlesip jumys júrgizildi jáne halyqqa yńǵaıly bolýy úshin jasaldy», - dedi Marat Haırýllın «SQ-Farmatsııa» JShS elordalyq logıstıkalyq habynda ótken monıtorıngte tilshilerge bergen suhbatynda.
QR-kod arqyly mindetti áleýmettik medıtsınalyq saqtandyrý júıesindegi barlyq dárilik zattardyń shekti baǵasyn kórýge bolady.
Sonymen birge, departament ókili dári-dármek baǵasy qymbattaǵan jaǵdaıda turǵyndardyń qaıda júgine alatynyn túsindirdi.
«Bizde Nur-Sultan qalasy boıynsha medıtsınalyq farmatsevtıkalyq qyzmetti baqylaý departamenti bar. Olar dári-dármek baǵasyn qadaǵalaıdy. Quqyqbuzýshylyq anyqtalǵan jaǵdaıda, bul ispen sybaılas jemqorlyqqa qarsy kúres departamentiniń tergeý bólimshesi aınalysady Al biz tek profılaktıkalyq jumystardy ǵana júrgizemiz», - deıdi M. Haırýllın.
Aıta keteıik, «Astana – adaldyq alańy» jobasy aıasynda Nur-Sultan qalasyndaǵy sybaılas jemqorlyqqa qarsy qyzmet dárilik zattar men medıtsınalyq buıymdar saqtalatyn «SQ-Farmatsııa» logıstıkalyq habyna monıtorıng júrgizdi.
Elordalyq biryńǵaı dıstrıbıýtor Soltústik Qazaqstan, Pavlodar, Aqmola, Qaraǵandy, Qostanaı oblystary jáne Nur-Sultan qalasyndaǵy 85 medıtsınalyq uıymdy dárimen qamtamasyz etedi.
