Elorda dárigerleri koronavırýsqa qarsy vaktsına alýǵa shaqyrdy
«Qalada 6 ınfektsııalyq statsıonar jumys istep tur. Onda 184 tósek-oryn bar. Qazir ınfektsııalyq statsıonarlarda 105 adam jatyr, júkteme 53,8%. Onyń ishinde 85 patsıentten KVI rastaldy, qalǵan 20 adam pnevmonııadan emdelýde. Sonymen qatar reanımatsııa bóliminde 7 patsıent em qabyldaýda», - dedi Astana qalasy qoǵamdyq densaýlyq saqtaý basqarmasy basshysynyń orynbasary Berik Qaıkenov qala ákimdiginde ótken brıfıngte.
Spıker keltirgen derekke sáıkes, búginde koronavırýsqa qarsy vaktsınanyń 1-komponentin 537 863, al 2-komponentti 520 822 adam aldy. Revaktsınatsııadan 169 myń adam ótti.
«Koronavırýstan emdelgennen góri onyń aldyn alǵan durys. Vırýstan saqtanýda vaktsınanyń úlken ról atqaratynyn taǵy bir eske salǵym keledi. Ýaqtyly vaktsınatsııa jáne revaktsınatsııadan ótken adam ımmýnıteti 90 paıyz jaǵdaıda indetke erkin tótep beredi. Qazir elordada 12 myńǵa jýyq vaktsına bar. Olardyń qatarynda Kazvak, Sınofarm jáne Pfaızer. Sol sııaqty 34 ekpe egý kabıneti jumys isteıdi», - deıdi ol.
Buǵan deıin habarlaǵanymyzdaı, Astanada COVID-19 vırýsynyń taralýy jeltoqsannyń jeti kúninde 4,6 ese artqan.
