Elorda dárigerleri 22 jastaǵy jigittiń julynǵan qolyn ornyna qaıta tigip berdi

ASTANA. QazAqparat - № 2 qalalyq kópbeıindi aýrýhananyń dárigerleri jas jigittiń qolyn aman saqtap qaldy, dep habarlaıdy QazAqparat Densaýlyq saqtaý mınıstrligine silteme jasap.

7 qańtarda patsıent shuǵyl túrde aýyr jaraqatpen aýrýhanaǵa tústi. Jas jigittiń oń qoly ıyq tusynan bólinip qalǵan.

Operatsııany eki brıgada 2 kezeńde júrgizdi.

Birinshi kezeńde angıohırýrgtar qan aǵymyn qalpyna keltirý úshin tamyrlardy tikti, ekinshi kezeńde travmatologtar bulshyqetti, nervti, sińirler men súıekterdi tikti.

«Operatsııa shamamen bes saǵatqa sozyldy. Biz árqashan búkil múshelerdi múmkindiginshe saqtap qalýǵa tyrysamyz. Operatsııa kezinde tamyr-nerv baılamyna tolyq revızııa jasaý kerek boldy, qoly tolyq julynyp ketkendikten barlyq bulshyqetter tigildi. Bastapqyda qoldy saqtap qalý jáne onyń fýnktsııasyn qalpyna keltirý múmkindigi az boldy. Biz onyń sátti aıaqtalǵanyna óte qýanyshtymyz», - deıdi dáriger-angıohırýrg Dastan Sabyruly.

Qazir patsıent ońaltý kýrsynan ótip jatyr.

Dárigerler oń qoldyń jumysyn qalpyna keltirýge belsendi qatysyp jatyr, konsýltatsııa jáne ártúrli ádisterdi qoldaný boıynsha usynym beredi.

«Biz operatsııany ońaltý áldeqaıda jyldam bolatyndaı etip jasaı aldyq. Qoly táýir bolyp ketti, qazirgi ýaqytta jigitti eshteńe mazalamaıdy», - dedi travmatolog dáriger Álimjan Dúısenbaev.

Foto:Densaýlyq saqtaý mınıstrligi