Elorda boıynsha biryńǵaı turǵyn úı tarıfin belgileý usynyldy
NUR-SULTAN. QazAqparat – iQamal kásipkerler men zańdy tulǵalar qaýymdastyǵynyń basshysy Gúlvıra Abetova Nur-Sultan qalasy boıynsha biryńǵaı turǵyn úı tarıfin bekitý týraly bastama kóterdi, dep habarlaıdy QazAqparat tilshisi.
Múlik ıeleri birlestikterin qurý máselesine arnalǵan qoǵamdyq tyńdaýda elorda boıynsha turǵyn úı tarıfin birizdendirý máselesi sóz boldy.
«Tarıfti qaıta qaraý múmkindikterin zerdeleý kerek sııaqty. Elordada 1997 jyldan beri tarıfi kóterilmegen úıler bar. Ondaı úılerdiń turǵyndary tarıftegi ózgeristerdi aıtarlyqtaı aýyr qabyldap jatady», - dedi iQamal qaýymdastyǵynyń basshysy.
Bul usynysty qoldaǵan qalalyq máslıattyń hatshysy Erlan Kanalımov tarıf teńsizdiginiń ózektiligine toqtaldy.
«Qala boıynsha naqty bir tarıfti bekitýge bolady dep oılaımyn. Buryn turǵyn úı qoryn kútip ustaýdyń erejeleri boldy emes pe? Osy tustardy eskere otyryp, máseleni keńinen qaraý kerek dep oılaımyn. Óıtkeni tarıfter shynymen de 15 teńgeden bastalyp 120-150 teńgege deıin barady. Munyń bári, birinshi kezekte, azamattardyń tólem qabiletin baılanysty», - dedi Erlan Kanalımov.
