Elorda birneshe kúnge Eýrazııanyń hokkeı astanasyna aınalady - Áset Isekeshov
ASTANA. QazAqparat - Búgin Astanada Qurlyqtyq hokkeı lıgasy men elordalyq «Barys» hokkeı klýby arasynda Astanada Hokkeı juldyzdarynyń aptasy 2018 sharasyn ótkizý týraly kelisimge qol qoıyldy.
Saltanatty rásimge QHL prezıdenti Dmıtrıı Chernyshenko jáne Astana qalasynyń ákimi Áset Isekeshev qatysty, dep habarlandy qalanyń resmı saıtynda .
Qol qoıylǵan memorandým Astanada 2018 jylǵy qańtardyń 10-ynan 14-ine deıin Hokkeı juldyzdarynyń aptasyn ótkizýdi qarastyrady jáne oǵan bir formatta Áıelderdiń hokkeı lıgasy juldyzdarynyń matchy, Erler hokkeı lıgasynyń Úndeý Kýbogi, QHL Juldyzdarynyń matchy, sonyń ishinde Sheberlik-shoý kiredi.
«Atalǵan memorandýmnyń mańyzy zor. Astanada Hokkeı juldyzdarynyń aptasyn ótkizý barlyǵymyz úshin qýanyshty ári qurmetti oqıǵa. Lıganyń úzdik oıynshylarynyń óneri «Barys» jankúıerleri úshin ǵana emes, Astananyń barlyq turǵyndary úshin umytylmas oqıǵa bolatyny anyq. Elorda birneshe kúnge Eýrazııanyń hokkeı astanasyna aınalady», - dep málim etti qala basshysy.
Sondaı-aq, ákim Lıga basshylyǵymen birge elorda ákimdigi jarystardyń joǵary uıymdastyrýshylyq deńgeıde ótýi úshin sharalar qabyldanatynyn jetkizdi.
«Jalpy, bizdiń qalamyzda sport jaqsy damyǵan. Astanany densaýlyǵy myqty adamdardyń qalasyna aınaldyrmaqpyz. Bul jumystaǵy basty baǵyttardyń biri saý ult pen bolashaq urpaqtyń kepili retinde buqaralyq sportty damytý bolyp tabylady. Búginde elorda halqynyń tórtten biri dene shynyqtyrýmen jáne sportpen aınalysady. Memleket basshysy 2020 jylǵa deıin Qalany damytý baǵdarlamasynda júıeli túrde sportpen shuǵyldanatyn elorda turǵyndarynyń sanyn 30 paıyzǵa jetkizý týraly tapsyrma qoıdy», - dedi ákim. 
«Astana Astanada Hokkeı juldyzdarynyń aptasyn ótkizý orny retinde kezdeısoq tańdalyp otyrǵan joq. Qazaqstan astanasy ınfraqurylymy damyǵan, QHL-daǵy eń zamanaýı jáne jaıly arenalary bar qala. Qazaqstan turǵyndarynyń hokkeıdi súıetinderi barshaǵa belili, jergilikti azamattar oıyndy jaqsy túsinedi, sol sebepti Hokkeı juldyzdarynyń aptasyn qýanyshpen qabyldaıtynyna senimdimiz. Osydan bir jyl buryn Ýfada bolǵanyndaı, biz sharaǵa daıyndyq jáne onyń uıymdastyrýdyń joǵary deńgeıin qamtamasyz etetin aıryqsha kelisimge otyrdyq. Astana-2018 sharasy juldyzdy shoý tarıhyndaǵy jarqyn betterdiń biri bolatynyna senim mol», -dep málim etti QHL prezıdenti Dmıtrıı Chernyshenko.
Astanaǵa Hokkeı juldyzdarynyń aptasy 2018 sharasyn ótkizý quqyǵyn berý týraly sheshim Lıgaǵa tórt úmitker qaladan túsken ótinishterdi zerttegen soń qabyldanǵan. Úmitkerler arasynda Astanamen birge Vladıvostok, Qazan jáne Helsınkı qalalary bolǵan. QHL arnaıy komıssııasy ár ótinishti muqııat qarap, talaptarǵa sáıkestigin tekserip, jumys qorytyndysy boıynsha Astanany tańdady. Qazaqstan elordasy hokkeı maýsymynyń bas shoýyn ótkizý quqyǵyna ıe bolǵan toǵyzynshy qala.
