Elorda bir kúnde maska taqpaý jáne áleýmettik qashyqtyq saqtamaýǵa qatysty 57 oqıǵa tirkeldi
NUR-SULTAN. QazAqparat - Búgin Nur-Sultan qalasy ákiminiń orynbasary Bahtııar Makenniń tóraǵalyǵymen beıne-baılanys arqyly koronavırýs ınfektsııasymen kúres jónindegi shtab otyrysy ótti, dep habarlaıdy QazAqparat qala ákimdigine silteme jasap.
Otyrys barysynda COVID-19-ǵa qarsy áreket etý komıssııasynyń jumys barysy, aýdandyq monıtorıng toptarynyń sanıtarlyq-epıdemıologııalyq jáne shekteý sharalary talaptarynyń saqtalýy, sondaı-aq elorda dárihanalaryndaǵy dári-dármekterdiń baǵasy men qol jetimdiligin baqylaý máseleleri talqylandy.
Qazirgi ýaqytta Nur-Sultan qalasynyń aýmaǵynda aýdandyq mobıldi monıtorıng toptary qurylǵan. Toptardyń mindeti – júrgizilip jatqan karantın sharalary boıynsha túsindirý jumystaryn júrgizý, sanıtarlyq qorǵanys quraldarynyń (sanıtaızerler, teplovızorlar, maskalar jáne t.b.) bar-joǵyn tekserý, sonymen qatar Nur-Sultan qalasynda kásipkerlik sýbektileriniń karantın rejımin buzý faktilerin anyqtaý.
«5 -20 shilde aralyǵynda mobıldi monıtorıng toptary 335 kásipkerlik sýbektisiniń sanıtarlyq normany saqtaýyna qatysty tekserý ótkizdi, 159 sýbektide buzýshylyq anyqtaldy. Búgingi tańda Nur-Sultan qalasynyń Taýarlar men qyzmetterdiń sapasyn baqylaý departamentimen karantın sharalary kezeńinde jumys rejımin buzǵany úshin QR ÁQBtK-niń 425-babynyń 1-tarmaǵy boıynsha 20 ákimshilik materıal jasalyp, 20 ákimshilik aıyppul salyndy (shaǵyn kásipkerliktiń árqaısysy 230 AEK mólsherinde, eger tólem 7 kún ishinde jasalsa, qysqartylǵan tártippen – 115 AEK, orta bıznes – 310 AEK, qysqartylǵan tártippen – 155 AEK)», - dedi elorda ákimdigi janyndaǵy tótenshe jaǵdaılardyń aldyn alý jáne olardy joıý jónindegi saraptamalyq-monıtorıng tobynyń jetekshisi Shyńǵys Qýatbekov.
Sonymen qatar Nur-Sultanda ótken táýlikte polıtsııa qyzmetkerleri, epıdemıologtar, eriktiler, jergilikti atqarýshy organdardyń ókilderi kiretin mobıldi toptar 78 karantın tártibin buzýshyny anyqtady. Onyń 57-i maska taǵý jáne áleýmettik qashyqtyq saqtaýdyń mindetti talaptaryn buzǵany úshin.
«Barlyq memlekettik organdar halyq arasynda túsindirý jumystaryn jalǵastyryp, azamattardy qoǵamdyq oryndarda sanıtarlyq normalardy saqtaýǵa shaqyrýy kerek. Demalys kúnderi turǵyndar toptyq oıyn-saýyq uıymdastyryp, elorda shetindegi kólderde karantın rejımin ǵana emes, qorshaǵan ortany da lastaýda», – dedi B. Maken.
Otyrys sońynda Nur-Sultan ákiminiń orynbasary aýdan ákimdikterine polıtsııa departamentimen, Taýarlar men qyzmetterdiń sapasyn baqylaý departamentimen birlesip, qala mańyndaǵy aýdandarǵa reıd júrgizýdi jáne karantın rejımi men qorshaǵan ortany qorǵaý qajettiligi týraly turǵyndarmen profılaktıkalyq áńgimelesý júrgizýdi tapsyrdy.
