Elorda bıyl halyqaralyq is-sharalar ótkizýden 2 mln eýro tabys tappaq

ASTANA. KAZINFORM – Ótken jyly elimiz iskerlik týrızmnen 20,7 mln dollar kiris aldy. Bul týraly Týrızm ındýstrııasy komıteti Týrızm salasyndaǵy júıeli sharalardy júzege asyrý basqarmasynyń basshysy Nurbol Baıjanov aıtty.

— Keıingi úsh jylda Qazaqstan halyqaralyq deńgeıdegi 21 is-sharany qabyldady. Al 2025 jyly 5 iri halyqaralyq is-shara ótkizý josparlanyp otyr. Ótken jyly elimizde 5 180 sheteldik delegattyń qatysýymen 14 halyqaralyq oqıǵa boldy. Ortasha eseppen alǵanda, olardyń árqaısysy shamamen 4 000 AQSh dollaryn jumsady. Osy is-sharalardan túsken kiristerdiń jalpy somasy 20,7 mıllıon dollardan asty. Bul qarajatqa ushý, turý, tamaqtaný jáne basqa da shyǵyndar kiredi, - dedi ol Ortalyq kommýnıkatsııalar qyzmetindegi brıfıngide. 

Onyń atap ótýinshe, Astana iskerlik jáne oqıǵalyq týrızmniń negizgi ortalyqtarynyń birine aınalyp keledi. Aldaǵy aılarda elordada birqatar aýqymdy halyqaralyq is-shara ótkizý josparlanǵan. 

— Máselen, 27-28 maýsymda AQSh, Kanada, Reseı, Eýropa jáne Azııadan 500 jetekshi maman qatysatyn 10-Dúnıejúzilik neırohırýrgııalyq qaýymdastyq kongresi ótedi. 21-25 shilde aralyǵynda Nazarbaev Ýnıversıteti halyqaralyq sarapshylar qoǵamynyń kongresin qabyldaıdy. Oǵan 1 000-nan astam qatysýshy keledi. 2025 jylǵy 18-22 tamyz aralyǵynda Astana IFLA Dúnıejúzilik kitaphanalyq jáne aqparattyq kongresin ótkizý alańyna aınalady. Kitaphanataný salasyndaǵy eń iri oqıǵa Qazaqstanda álemniń 130-dan astam elinen 4000-ǵa jýyq delegatty jınamaq. Atalǵan MІSE is-sharany ótkizý Astanaǵa shamamen 2 mln eýro tabys ákeledi dep kútilýde. Jıyntyq paıda delegattardyń turýǵa, kólikke, tamaqtanýǵa jáne basqa da qyzmetterge jumsaǵan shyǵyndarynan quralady, - dedi Nurbol Baıjanov.

Aıta keteıik, keıingi 5 jylda týrısterdiń sany 7,5 esege ósti. Byltyr elimizge 15 mln-nan astam adam saıahattap keldi.