Elorda basshysy: Aǵymdaǵy jyldyń ortasynda qalǵan 7 problemaly nysan paıdalanýǵa beriledi

Bul týraly búgin Elbasy N.Nazarbaevtyń qatysýymen ótken elordanyń ári qaraı damýy máselerine arnalǵan keńes barysynda Astana qalasynyń ákimi Imanǵalı Tasmaǵambetov málim etti.

«Astanadaǵy 243 problemaly nysannyń tolyǵymen aıaqtalǵandyǵy týrasynda jeke baıandaǵym keledi. Sonymen qatar túsinispeýshilik týyndamaýy úshin qalada taıaýda ǵana problemaly sanatqa jatqyzylǵan úleskerlerdiń qatysýyndaǵy 7 nysannyń bar ekendigin atap ótkim keledi. Árbir nysanda keshendi problemalar boldy, olar qazirgi ýaqytta sheshildi jáne osy jyldyń ortasynda salynyp bitedi», - dedi I.Tasmaǵambetov.

Qala basshysynyń aıtýyna qaraǵanda, sońǵy úsh jyldyń ishinde 4 mln. sharshy metrden astam turǵyn úı paıdalanýǵa berilgen.

«Taıaý úsh jylda ártúrli qarjy kózderiniń esebinen shamamen 5 mln. sharshy metr turǵyn úı paıdalanýǵa beriledi», - dedi qala basshysy.