Elorda balabaqshasyndaǵy bala ólimi: Sábı denesinen jaraqat anyqtaldy

NUR-SULTAN. QazAqparat – Elorda balabaqshasyndaǵy sábıdiń ólimine qatysty tergeý júrip jatyr. Qaıǵyly oqıǵa osy jyldyń sáýir aıynda bolǵan. Búldirshin úıdegi jeke baqshada bolǵan. Tolyǵyraq aqparatty Polıtsııa departamenti jarııalamaı otyr, dep habarlaıdy QazAqparat tilshisi.

Buǵan deıin buqaralyq aqparat quraldarynda búldirshin qyzdyń sýǵa túsý kezinde batyp ketkeni, denesinen kóptegen jaraqat tabylǵany habarlanǵan bolatyn. Polıtsııa da bul faktilerdi rastap otyr.

Elordalyq polıtsııa departamentiniń málimetinshe, osy jyldyń sáýirinde «102» arnasyna Taha Hýseın kóshesindegi páterden dene jaraqattary kórinetin 2020 jyly týǵan jas qyzdyń máıiti tabylǵany týraly habarlama túsken. Atalǵan fakti Baıqońyr aýdandyq polıtsııa basqarmasynda sotqa deıingi tergep-tekserýdiń biryńǵaı tizilimine QR Qylmystyq kodeksiniń 141-baby 2-tarmaǵymen tirkelgen.

«Qazirgi ýaqytta barlyq qajetti tergeý áreketteri júrgizilýde jáne birqatar saraptama taǵaıyndaldy. Onyń qorytyndysy boıynsha protsessýaldyq sheshim qabyldanady. QR Qylmystyq-protsestik kodeksiniń 201-babyna sáıkes, sotqa deıingi tergep-tekserý derekteri prokýrordyń ruqsatynsyz jarııa etilýge jatpaıdy», - dedi polıtseıler QazAqparat tilshisiniń saýalyna bergen jaýabynda.

Eki jasar sábıdiń ólimine balabaqsha kútýshisi kúdikti dep tanylǵan. Polıtsııa bul jaıtqa qatysty da egjeı-tegjeıli málimet bermedi.