Elorda aıaldamalarynda jańa karta-syzbalar ornatyldy
ASTANA. 7 aqpan. QazAqparat - Astananyń birneshe avtobýs aıaldamalaryna turǵyndar men qonaqtardyń qalada júrip-turýy úshin baǵyt-baǵdardy anyqtaýǵa múmkindik beretin yńǵaıly jańa karta-syzbalar ilindi.
Astana.kz saıtyna qalalyq Jolaýshylar tasymaly jáne avtomobıl joldary basqarmasynan habarlaǵanyndaı, jańa karta-syzba ázirge tek elordanyń eń iri ortalyq kóshelerindegi 5 aıaldama keshenine ornatylǵan.
Olar: Respýblıka dańǵyly men Kenesary kóshesinde ( «Kongress Holl» aıaldamasy - eki baǵytta; «A. Imanov kóshesi» aıaldamasy - eki baǵytta jáne «Jánibek tarhan» aıaldamasy -Baraev kóshesi baǵytynda bir baǵytta).
«Aıaldamalardy jańa karta-syzbamen jaraqtandyrý jumystary aldaǵy ýaqytta odan ári jalǵasatyn bolady», - deıdi basqarma qyzmetkerleri.
Jańa karta-syzbada sol aıaldamadan ótetin árbir avtobýs baǵdarlary arnaıy túspen belgilengen. Sonymen qatar, belgili bir baǵytta aıaldamadan ótetin naqty avtobýstyń tek bir baǵyttaǵy baǵdary ǵana kórsetilgen. Bul jolaýshylardyń shataspaýyna yńǵaıly. Barlyq jazýlar men aıaldama ataýlary tek memlekettik tilde jazylǵan.
