Elorda avtoparkterinde aýqymdy dezınfektsııa júrgizildi

NUR-SULTAN. QazAqparat - Elordada qoǵam kólik júrgizýshileri kún saıyn aýysymynan keıin avtobýsyna dezınfektsııa jasaıdy. Tutqalar men oryndyqtar, esik, valıdator jáne jolaýshylar ustaıtyn jerler súrtiledi. Vırýstyń taralýynyń aldyn alý úshin avtobýs salony jeldetiledi, dep habarlaıdy QazAqparat qala ákimdigine silteme jasap.

Qaladaǵy epıdemıologııalyq ahýaldyń nasharlaýyna baılanysty Nur-Sultan qalasynyń bas memlekettik sanıtarlyq dárigeriniń qaýlysyna sáıkes elordada senbi-jeksenbi kúnderi qoǵamdyq kóliktiń jumysy toqtatyldy. Avtobýstar men avtoparkterde arnaıy zalalsyzdandyratyn eritindimen aýqymdy dezınfektsııa júrgiziledi.

«Avtoparkimizdiń qala boıynsha tórt orny bar. Qaramaǵymyzdaǵy 778 avtobýs jurtshylyqqa qyzmet etedi. Dál qazir biz turǵan negizgi keńsede avtobýs jýatyn eki oryn bar. Munda kúnine 300-ge jýyq qoǵamdyq kólik jýylady. Jýylǵannan keıin mindetti túrli dezınfektsııa óńdeýinen ótedi. ıAǵnı ár avtobýs kúnine bir ret jýylyp, bir ret óńdeledi. Osyǵan deıin avtobýstar jeksenbi kúnderi ǵana toqtatylyp, dezınfektsııalanatyn. Endi osy aptadan bastap elordanyń bas memlekettik sanıtarlyq dárigeriniń qaýlysyna sáıkes óńdeý jumysy senbi, jeksenbi kúnderi júrgiziledi», - deıdi «№1 avtopark» AQ basqarma tóraǵasy Baýyrjan Tileýbergen.

Basqarma tóraǵasy dezınfektsııa jumysyn avtoparktiń arnaıy oqýdan ótken mamandary júrgizetinin málim etti.

«Dezınfektsııa jumysyn avtoparktiń, ıaǵnı ózimizdiń sertıfıkattalǵan mamandarymyz júrgizedi. Olardy arnaıy oqytyp, synaqtan ótkizdik. Al óńdeý jumysyna adam densaýlyǵyna zııany joq, mektepke deıingi uıymdarda, mektepterde, aýrýhanalarda qoldanylatyn eritindi paıdalanylady. Dezınfektsııa qory jetkilikti», - deıdi №1 avtopark basshysy.

Avtoparktiń erejesi boıynsha qoǵamdyq kólikter jýylyp bolǵan soń ǵana dezınfektsııalyq óńdeý jasalady. №1 avtobýs parkinde arnaıy oqýdan ótken 10 dezınfektor jumys isteıdi.

«Bul avtoparkte jumys istegenime 13 jyldan asyp ketti. Bastapqyda kondýktor qyzmetin atqarǵanmyn. Tsıfrlyq zamannyń aǵymyna qaraı kondýktor qyzmeti toqtaǵannan keıin dezınfektorlyqqa aýystym. Jańa mamandyq bolǵannan keıin tıisinshe oqýdan óttik. Qolymyzda arnaıy sertıfıkatymyz bar. Jumysym negizinen 19:00-de bastalyp, sońǵy avtobýsty dezınfektsııa jasaǵanǵa deıin jalǵasady», - deıdi №1 avtoparktiń dezınfektory Raıhangúl Ábdikerova.

Qaladaǵy epıdemıologııalyq jaǵdaı áli de qubylmaly bolyp otyr. COVID-19 ınfektsııasyn juqtyrǵan naýqastar sany ósip keledi. Máselen, ótken táýlikte elordada 1,5 myńnan astam adamnan koronavırýs anyqtaldy.

Turǵyndardy koronavırýstan saqtaý úshin avtobýs salondarynda antıseptık ornatylǵan. Kólik júrgizýshileri men qyzmetkerleri jeke qorǵanys quralyn taǵyp júredi.

Eske sala keteıik, elordadaǵy qoǵamdyq kólikte jolaýshylar mindetti túrde betperde taǵýy kerek.