Elorda avtobýstarynyń jol apattaryna túsý sebebi ataldy
NUR-SULTAN. QazAqparat - Elordada jolaýshylar tasymaly salasynda jol-kólik oqıǵalarynyń aldyn alý jáne olardy boldyrmaý maqsatynda «Astana LRT» JShS basshylyǵymen keńes ótti, dep habarlaıdy QazAqparat.
Sharaǵa barlyq avtobýs parkteriniń dırektorlary, kásipodaq ókilderi jáne bas memlekettik eńbek ınspektory qatysty. Onyń barysynda qoǵamdyq kóliktiń jumysy, qyzmetkerlerdiń quqyqtaryn tıimdi qorǵaý máselesindegi kásipodaq uıymdarynyń róli talqylandy.
Qalalyq kásipodaq ortalyǵynyń tóraǵasy Tastanbek Esentaevtyń aıtýynsha, jazataıym oqıǵalar kóp jaǵdaıda eńbektiń qanaǵattandyrarlyq deńgeıde uıymdastyrylmaýynan, qaýipsizdik talaptarynyń buzylýynan bolady. Ol kásipodaq ókilderin qoǵamdyq kólik júrgizýshileriniń quqyqtaryn qorǵaýda belsendi pozıtsııa ustanýǵa shaqyrdy.
«Al tasymaldaýshylar júrgizýshilerdiń tapshylyǵy týraly ózekti máseleni qozǵady. Olar tabysty kóleńkeli aınalymnan shyǵara alǵandaryn moıyndaıdy. Alaıda, jolaýshylar tasymalynyń sapasyn arttyrý úshin sýbsıdııalardyń mańyzdylyǵyn atap ótti», - delingen «Astana LRT» JShS aqparatynda .
Nur-Sultan qalasynyń bas memlekettik eńbek ınspektory Erlan Ismaǵulov taraptardyń jaýapkershiligi turǵysynda eńbek zańnamasynyń mańyzdy aspektilerin túsindirip ótti.
«Júrgizýshiniń jumysy asa qaýipti. Olardyń eńbek jáne demalys tártibin saqtaý - óte mańyzdy másele. Tájirıbe kórsetip otyrǵandaı, rejimniń buzylýy joldardaǵy apattyq jaǵdaılarǵa ákelýi múmkin», - dedi ol.
Sondaı-aq E.Ismaǵulov avtobýs parkteri dırektorlarynyń jáne júrgizýshilerdiń eńbek qatynastaryn jaqsartý boıynsha birlesken jumys júrgizýdi jáne árbir avtokásiporyndaǵy eńbek rejimine únemi aýdıt júrgizýdi usyndy.
