Elorda avtobýstarynyń alǵashqy jumys kúni: Qala kóshelerinen reportaj
Nur-Sultan qalasynyń avtobýs júrgizýshileri úshin jumys kúni búgin tań atysymen bastaldy. Qala kóshelerine shyǵatyn avtobýstar aldymen jiti dezınfektsııadan ótkiziledi. Osydan keıin tańǵy saǵat 7-de jolaýshylar avtobýspen dittegen jerine bara alady.
«Jumysymyzdy tańerteńgi 7-den bastaǵan edik. Ázirshe jolaýshylar qarasy qalyń emes. Múmkin qoǵamdyq kóliktiń júre bastaǵanyn áli estimeı jatqan shyǵar. Jumys barysynda qaýipsizdiktiń barlyq sharalaryn saqtap, jolaýshylardyń múmkindiginshe bir-birinen alshaq bolýyn qadaǵalap otyramyz. Antıseptıkti únemi qoldanamyz. Sońǵy aıaldamada avtobýstyń ishinde zalalsyzdandyrý jumystaryn júrgizemiz», - deıdi №56 baǵdardyń júrgizýshisi Sáken.
Avtobýstardyń syrtqy qaptalynda iri áriptermen «Maskasyz kirmeńizder!» degen eskertý japsyrylǵan.
«Iá, búginnen bastap jumysqa kiristik. Áriptesterimniń basym bóligi jumys bastalǵanyna qýanyp jatyr. Al ózim karantın kezinde de demalmaı, tapsyrys boıynsha jumys istegen edim. Bizdi túrli uıymdar qyzmetkerlerin tasymaldaý úshin jaldady», - deıdi №29 baǵdar júrgizýshisi Erasyl.
Erasyl da avtobýs salony bir táýliktiń ishinde 2-3 ret dezınfektsııalanatynyn aıtady.
Aıaldamalarda avtobýs kútken jolaýshylar tur. Degenmen, ádettegi kúndegideı emes, adam aıaǵy sırek. Ózin Álııa dep tanystyrǵan elorda turǵyny qoǵamdyq kóliktiń jolǵa shyqqany durys boldy dep esepteıdi.
«Jumystaryńmen qala ishinde júrýge múmkindik jasalǵany durys boldy. Shynymdy aıtsam, úıde bos otyryp, ábden sharshap kettik. Biraq, amal qansha. Endi qoǵamdyq kólikpen ary-beri júrgende qaýipsizdik sharalaryn qatań saqtaǵanymyz joq. Erkinsýge bolmaıdy. Sebebi, koronavırýs áli tolyq joıylmady, elimizde de, elordamyzda da indet áli bar», - dedi ol.
Balalarymen qydyrýǵa shyqqan taǵy bir elordalyq Rýslan esimdi jolaýshy da avtobýstardyń qatynaı bastaǵanyn qup kóredi.
«Balalar úıden ábden zerigip, dalaǵa shyqqysy keledi. Árıne, aýladaǵa balalar alańy ashyldy. Alaıda, balalar serýendegisi keledi. Sondyqtan taza aýa jutyp, boı sergitsin dep saıabaqqa alyp bara jatyrmyn. Qaýipsizdik sharalaryn da esten shyǵarmaımyz, maskamyz bar», - dep kúledi Rýslan.
CTS kompanııasy qoǵammen baılanys qyzmetiniń jetekshisi Oksana Loskýtova búgin tańerteń 392 avtobýs jolǵa shyqqanyn aıtady. Jalpy jospar boıynsha qala kóshelerinde 451 avtobýs júıtkýi tıis bolǵan. Jýylyp-shaıylyp, zalalsyzdandyrylyp úlgergeni osy bolypty.
Sonymen saǵat 07:00-21:00 aralyǵynda júretin qoǵamdyq kóliktiń júrgizýshisine de, jolaýshysyna da dezınfektsııalyq talap pen qaýipsizdik sharalary birdeı. ıAǵnı, olar maska taǵyp, qolǵap kıip, antıseptık paıdalanyp otyrýy qajet.
Jolaýshylar jolaqysyn qolma-qol aqshamen tóleı almaıdy. Bılet satylmaıtyndyqtan jolaqy tóleý SMS, QR-kod jáne mobıldi qosymshalar arqyly qolma-qol aqshasyz júrgiziledi. Karantın engizilgenge deıin de qolma-qol aqshasyz tólem úlesi 98 paıyz bolǵan-dy. Al QR-kod nemese kodty terý arqyly tóleý úshin kaspi.kz, Homebank, SMSBUS, Rahmet, AstraBus, My Beeline, SENIM, Plus24, My Activ, OYBY qosymshalaryn paıdalanýǵa bolady. Activ/Kcell, Beeline, Tele2, Altel abonentteri úshin telefon teńgerimi arqyly SMS-pen tólem jasaý (2505 nómirine habarlama jiberý) qoljetimdi.
Aıta keterligi, búgin elordadaǵy qoǵamdyq kólik qozǵalysyna jaýapty «Cts» kompanııasy RTVM-avtomattar, kassalar men qashyqtyqtan tolyqtyrý servısteri (Transcard, Kaspi.kz, Qiwi, Kassa24 jáne taǵy basqa) qaıtadan jumys isteı bastaǵanyn habarlaǵan bolatyn.
