Elorda avtobýstarynda eki ret jolaqy alynatyndyǵy rastaldy
ASTANA. QazAqparat - Adam quqyqtary jónindegi ulttyq ortalyq qoǵamdyq kólikterge tekserý júrgizip, onyń qorytyndysyn jarııalady, dep habarlaıdy QazAqparat QR Adam quqyqtary jónindegi ýákil Asqar Shákirovke silteme jasap.
«Astana turǵyndary avtobýs valıdatorlarynyń kartadan eki ret tólem alatynyn, jolaýshylar kóp júretin ýaqytta kólik keptelisinen 60 mınýtta ekinshi avtobýsqa tegin aýysyp minýge úlgermeıtinderin aıtyp shaǵymdanǵan edi», - dep atap ótti A. Shákirov.
Onyń aıtýynsha, valıdatorlardyń eki ret jolaqy alady degen turǵyndardyń kúdigi rastaldy.
«Adam quqyqtary jónindegi ulttyq ortalyqqa jáne baspasóz quraldaryna, áleýmettik jelige túsken shaǵymdarǵa saraptama jasaldy jáne ulttyq ortalyq qyzmetkerleri jekelegen avtobýs baǵyttaryna tekserý júrgizdi. Nátıjesinde, Astana turǵyndarynyń kúdigi rastaldy», - dep málimdedi Asqar Shákirov.
Buǵan deıin jolaýshylar aldyńǵy esikten kirgendegi valıdator 180 teńge, al avtobýstardyń basqa valıdatorlary 90 teńge alatynyn aıtyp aryzdanǵan edi. «Astana LRT» ókilderi Kólik kartalarynan eki ret tólem alynýy múmkin emes dep jaýap berdi.
Dıfferentsıaldy tarıf 2018 jyldyń 21 shildesinde óz kúshine endi. Jańa tártipke sáıkes, tólemdi kartamen júzege asyrý kezinde jol aqysy ózgerissiz 90 teńge kóleminde qaldy. Budan bólek, kólik kartasyn paıdalanýshylaryna arnalǵan basymdyq - birneshe kólikke aýysyp otyryp, tegin júrý quqyǵy saqtaldy. Aqshalaı tólem kezinde qalalyq avtobýsta júrý quny - 180 teńge.
