Elorda avtobýstarynda bıletsiz júrgenderge aıyppul salyndy
ASTANA. QazAqparat - Astanada sońǵy eki kúnde qalalyq kólikte bıletsiz júrgen 34 jolaýshyǵa aıyppyul salyndy, dep habarlaıdy QazAqparat tilshisi «Astana LRT» baspasóz qyzmetine silteme jasap.
«Sońǵy eki kúnde elorda avtobýstarynda 34 jolaýshy anyqtaldy. Olarǵa jalpy somasy 163 540 teńge mólsherinde aıyppul salyndy (qoǵamdyq kólikte jolaqy tóleýden jaltarý eki aılyq eseptik kórsetkish nemese 4 810 teńge mólsherinde aıyppul salýǵa negiz bolady). Sol 34 jolaýshynyń ishindegi bireýi zeınetker bolyp shyqty», - delingen kompanııanyń resmı habarlamasynda.
«Astana LRT» JShS basqarma tóraǵasy Bekmyrza Igenberdınov te baqylaýdyń kúsheıtiletini týraly eskertti.
«Kólikte kútpegen jerden baqylaý júrgiziledi. Qaı sátti, qaı aıaldamada baqylaý bolatynyn eshkim bilmeýi tıis. Jeńildik kartalardyń ıelerine avtobýsqa kirgen boıda valıdatsııa júrgizý qajettigin eskertemiz. Tekserý kezinde valıdatsııa jasalmaǵany anyqtalsa, bul - aqy tóleýden jaltarýǵa teńestiriledi», - dedi B. Igenberdınov Astanadaǵy brıfıngte.
Ol 21 shildeden bastap dıfferentsııalanǵan tarıftiń engizilýine baılanysty, kondýktor laýazymynyń joıylatynyn taǵy da eske saldy. Qazirgi tańdaǵy kondýktorlardyń barlyǵy elektrondy tólem júıesi jónindegi keńesshilerdiń qyzmetin atqara bastaıdy.
«Keńesshiler erteńnen bastap valıdatorlarmen jumys isteý boıynsha barynsha kómektesedi. Olardyń jolaýshylardy avtobýstan shyǵaryp jiberetin quzyreti joq. Bul mańyzdy faktor. Olar endi avtobýstarda tek keńes berýmen aınalysady. Al avtobýstan shyǵaryp jiberýge tek baqylaýshylardyń quqyǵy bar», - dep málimdedi kompanııa basshysy.
Sonymen qatar ol keńesshilerdiń jalaqysy kondýktorlardyń jalaqysymen birdeı mólsherde saqtalatynyn atap kórsetti.
