Elorda avtobýstarynda bılet bermegeni úshin salynatyn aıyppul somasy kóterilýi múmkin
ASTANA. QazAqparat - Elordalyq avtoparkterdiń basshylyǵy júrgizýshilerdiń ádepsizdigi men dórekiligi úshin jaýapqa tartylady, dep habarlady ákimdiktiń medıa ortalyǵy .
Qalalyq jolaýshylar kóligi basqarmasynyń basshysy Bekmyrza Igenberdınov qoǵamdyq kólikterde júrgizilgen reıdtiń nátıjelerimen bólisti. Onyń sózine qaraǵanda aldaǵy ýaqytta qyzmet kórsetýdiń sapasyn arttyrý boıynsha máseleler sheshiletin bolady. Birinshi kezekte júrgizýshiler JQE-niń óreskel buzýshylyqtary úshin avtoparkterdiń basshylary da jaýapqa tartylatyn bolady.
«Men óz tarapymnan avtoparkterdiń basshylyǵyna sońǵy eskertý jasadym. Egerde avtobýs júrip bara jatqan kezde taǵy da esik jabylyp, ashylatyn bolsa, avtoparktiń basshylyǵy mindetti túrde jaýapqa tartylady. Avtobýstar óte yńǵaıly, jol jaqsy kórinedi, shopyr óziniń aınalasyn, joldy 360 gradýsqa aıqyn kóredi. Sondyqtan da júrip bara jatqan avtobýstyń esigin ashyp, jabý jumysqa selqos qaraý dep túsinemin», - dedi Bekmyrza Igenberdınov
Onyń sózine qaraǵanda qaziri ýaqytta jol bıletterinsiz júrý nemese jol bıletterin bermeý jaǵdaılary úshin jazalaý qatańdatyldy.«Biz qazir normatıvtik-quqyqtyq aktilerge ózgeris engizýdi usynyp otyrmyz, ol bıletsiz jolaýshylarǵa, bılet taratpaıtyn kondýktorlarǵa baılanysty aıyppuldarǵa qatysty. Búginde ol 2 AEK, keıbireýleri úshin múmkin bul soma kóp emes shyǵar, biraq jalpy alǵanda álemdik tájirıbe aıyppul somasyn 20-30 AEK-ke deıin arttyrýdy kórsetip otyr», dedi Bekmyrza Igenberdınov.
Qalalyq jolaýshylar kóligi basqarmasynyń basshysynyń málimetteri boıynsha qoǵamdyq kólikpen elordada kúnine 800 myń adam qatynaıdy.
