Elorda avtobýstarynda qolma-qol aqshamen jolaqy tóleý qaıta engizilmek
ASTANA. KAZINFORM — Elordada qalalyq jáne qala mańy qatynastarynda jolaýshylar men bagajdy avtomobılmen turaqty tasymaldaý baǵdarlaryna saralanǵan tarıf engiziledi.
Qujatqa sáıkes, qalalyq qoǵamdyq kólikte jolaqysyn elektrondyq jol júrý qujaty nemese elektrondyq tólemniń qosymsha qyzmetteri arqyly qolma-qol aqshasyz tólegen jaǵdaıda jolaqysy 150 teńge.
Al jedel qalalyq avtobýstarda qolma-qol aqshasyz tólem kezinde jol júrý quny 300 teńge bolyp belgilengen.
Áleýmettik mańyzy bar turaqty tasymal baǵyttarynda da elektrondyq tólem arqyly jol júrý aqysy 150 teńge bolady.
Al qolma-qol aqshamen tólegen kezde qalalyq avtobýsta jol júrý quny 300 teńge. Jedel qalalyq avtobýstarda bul soma 400 teńge bolyp belgilengen.
Áleýmettik mańyzy bar turaqty tasymal baǵyttarynda qolma-qol tólem tarıfi de 300 teńge bolady.
Qala mańy baǵyttarynda jolaqysy júrilgen qashyqtyqqa qaraı esepteledi. Elektrondyq tólem kezinde bir kılometr úshin 13 teńge, al qolma-qol aqshamen tóleý kezinde bir kılometr úshin 19 teńge belgilengen.
Sonymen qatar jeńildik kartasymen áleýmettik mańyzy bar turaqty tasymal baǵyttarynda jol júrý aqysy 0 teńge.
Elektrondyq jolaqy tóleý júıesi jaramsyz bolǵan jaǵdaıda elektrondyq jol júrý qujaty nemese elektrondyq tólemniń qosymsha qyzmetteri arqyly tólemdi júzege asyratyn jolaýshy tegin jol júrýdi paıdalanady.
Osylaısha, Astanada qoǵamdyq kólik tarıfteri kólik túrine, baǵyttyń sanatyna jáne tólem tásiline qaraı saralanǵan.
Astana qalasy ákimdiginiń qaýlysy 14 qazanda resmı jarııalandy. Qujat alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Buǵan deıin Astanada qoǵamdyq kólikte jol júrý aqysy 150 teńgege kóteriletinin jazǵan edik.
