Elorda aýrýhanalaryna kúnine 500 adam túsedi, onyń teń jartysynan pnevmonııa anyqtalady
NUR-SULTAN. QazAqparat – Bıyl maýsym aıynan bastap elordada aýrýhanaǵa pnevmonııamen túsetinder sany artty. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.
«17 maýsymdaǵy jaǵdaı boıynsha, elordanyń juqpaly aýrýlar jáne ýaqytsha aýrýhanalarynda 1711 adam jatyr. Bul óz kezeginde jalpy syıymdylyqtyń 90 paıyzyn alyp otyr. Olardyń ishinde 80 adam reanımatsııa bóliminde, al ókpeni jasandy jeldetýge qosylǵan naýqastar sany 4 ese ósti. Olardyń 91 paıyzy ortasha aýyr dárejede, 9 paıyzy aýyr jáne óte aýyr jaǵdaıda», - S. Qısyqova Ortalyq kommýnıkatsııalar qyzmetinde.
Osy oraıda ol bul naýqastar shuǵyl túrde jansaqtaý bólimine túsetinin naqtylady.
«Eger jyl basynda kúnine orta eseppen pnevmonııamen bes naýqas kelip tússe, maýsym aıynan bastap kún saıyn ortasha alǵanda 500 adamǵa jýyq keledi. Onyń ishinde árbir ekinshisi vırýs pnevmonııasymen jatqyzylady», -dedi basqarma basshysy.
Budan buryn habarlanǵandaı, elordada 20-dan astam vırýsolog koronavırýs juqtyrdy.
Buryn qalada bir ǵana zerthana bolsa, qazir qalada kúnine 5 myńǵa deıin test ótkizetin 8 zerthana bar. 17 maýsymdaǵy jaǵdaı boıynsha shamamen 170 myń test ótkizildi. Qazir 40 myńnan astam test qoljetimdi.
