Elorda aýmaǵynda sý basý qaýpi bar 29 ýchaske anyqtaldy
NUR-SULTAN. QazAqparat – Bıyl Nur-Sultan qalasynyń aýmaǵyndaǵy qardyń kólemi byltyrǵydan 13,6 ese kóp. Qalalyq tótetnshe jaǵdaılar departamenti basshysynyń orynbasary Esen Baıyrov osyndaı málimet aıtty, dep habarlaıdy QazAqparat tilshisi.
Elordadaǵy sý tasqynyna daıyndyq sharalary týraly onlaın-bırıfıng arqyly aqparat bergen tótenshe jaǵdaı ókili sáýirdiń alǵashqy 10 kúninde kún kúrt jylynýy múmkin degen boljam aıtty.
«Nur-Sultan qalasy boıynsha 29 sý basý qaýpi bar ýchaske anyqtaldy. 1 sáýirdegi jaǵdaı boıynsha qala aýmaǵynan 7 mln tekshe metr qar shyǵarylǵan. Tasqynmen kúreske azamattyq qorǵanys organdarynyń jeke quramynan 663 adam jáne 185 tehnıka toby jasaqtalyp, daıyn tur. Departament mamandary 1,5 myń úıdi aralap, túsindirý jumystaryn júrgizdi. Qar shyǵarý boıynsha 900-den astam usynymdar berildi», - dedi departament ókili.
Sondaı-aq, Esen Baıyrov turǵyndarǵa tasqyn kezeńine daıyndyqty qalaı durys júrgizýi kerektigin onlaın sabaqtar arqyly túsindirip jatqandaryn atady. Bul maqsatqa qaladaǵy bilim oshaqtarynyń bazasy paıdalanylýda. Búginge deıin bilim berý nysandarynyń kómegimen 1,5 myń adamǵa osyndaı ınteraktıvti sabaq ótkizilgen.
