Elorda aýlalaryndaǵy zańsyz shlagbaýmdar men beton bógetter tekserilip jatyr
ASTANA. KAZINFORM – Astanada kópqabatty turǵyn úılerdiń aýlalarynda arnaıy qyzmet kólikteriniń qozǵalysyna kedergi keltiretin zańsyz bógetterge qarsy profılaktıkalyq reıd ótti.
Іs-sharanyń basty maqsaty — órt sóndirý, jedel járdem jáne polıtsııa kólikteriniń tótenshe jaǵdaı kezinde oqıǵa ornyna kedergisiz ári ýaqytyly jetýin qamtamasyz etý.
Reıdti Astana qalasynyń Tótenshe jaǵdaılar departamenti, prokýratýra, Polıtsııa departamenti jáne qala ákimdigimen birlesip ótkizdi. Mamandar aýlalardy aralap, zańsyz ornatylǵan beton bloktardy, shynjyrlardy, shlagbaýmdardy jáne arnaıy tehnıkanyń júrýine kedergi keltiretin ózge de tosqaýyldardyń bar-joǵyn tekserdi. Memlekettik qyzmetter ókilderiniń aıtýynsha, zańbuzýshylyqtar boıynsha olardy qoldanystaǵy zańnamaǵa sáıkes joıý sharalary qabyldanady.
— Astana qalasynyń Tótenshe jaǵdaılar departamenti mundaı reıdtik is-sharalardy júıeli túrde ótkizedi. Bul reıdter prokýratýra, ishki ister organdary jáne ákimdik ókilderimen birlesip uıymdastyrylady. Reıdterdiń negizgi maqsaty — órt qaýipsizdigi talaptarynyń buzylýynyń aldyn alý, anyqtalǵan zańbuzýshylyqtardy joıý. Sondaı-aq turǵyndarǵa órt qaýipsizdigi erejelerin saqtaýdyń mańyzyn túsindirý. Osyǵan baılanysty reıd barysynda turǵyndarmen túsindirý jumystary júrgizilip, órt qaýipsizdigi talaptaryn buzýǵa jol bermeý qajettigi keńinen nasıhattalady, — dedi Astana qalasy Tótenshe jaǵdaılar departamenti bastyǵynyń mindetin atqarýshy Ómirjan Tuqyshev.
Mamandardyń aıtýynsha, kóp jaǵdaıda turǵyndar kólik qoıý oryndaryn saqtap qalý nemese bógde kólikterdiń kirýin shekteý úshin ártúrli kedergiler ornatady. Alaıda mundaı áreketter tótenshe jaǵdaı kezinde sanaýly mınýttyń ózin sheshýshi faktorǵa aınaldyryp, adam ómirine qaýip tóndirýi múmkin.
