Elorda áýejaıyndaǵy zańsyz taksıst 2 táýlikke qamaýǵa alyndy
«Astana qalasy áýejaıyndaǵy jelilik polıtsııa bóliminiń qyzmetkerleri patrýldeý barysynda №1 termınalda elordanyń 37 jastaǵy turǵynyn anyqtady. Ol áýejaıdan shyǵa beriste jolaýshylardyń mazasyn alyp, taksı qyzmetin usynyp, tártip saqshylarynyń eskertýlerine qulaq aspaǵan.
Sonymen qatar er adam polıtsııa bólmesine jetkizý kezinde polıtseılerdiń zańdy talaptaryna baǵynbaǵan.
Oǵan qatysty QR ÁQBtK-niń 449-babynyń 1-bóligi (Qoǵamdyq oryndarda tıisý) jáne 667-baby 1-bóligi (Quqyq qorǵaý organy nemese arnaýly memlekettik organ, áskerı polıtsııa organy, memlekettik feldegerlik qyzmet qyzmetkeriniń (áskerı qyzmetshisiniń), sot prıstavynyń, sot oryndaýshysynyń zańdy ókimine nemese talabyna baǵynbaý) boıynsha ákimshilik hattamalar toltyryldy.
Astana qalasynyń mamandandyrylǵan aýdanaralyq ákimshilik sotynyń sheshimimen quqyq buzýshy eki táýlikke qamaýǵa alyndy», - delingen polıtsııa aqparatynda.
Eske salaıyq, 2 sáýirde zańsyz taksı qyzmetimen aınalysqan taǵy bir júrgizýshi Astana áýejaıyndaǵy polıtsııa qyzmetkerleriniń zańdy talabyna baǵynbaı, ákimshilik jaýapkershilikke tartylǵan bolatyn.
Jalpy jyl basynan elimizdiń áýe jáne temirjol kóligi nysandarynda kólik polıtseıleri qoǵamdyq oryndarda adamdardyń mazasyn alǵany úshin 778 tulǵany ákimshilik jaýapkershilikke tartty. Onyń 220-sy – zańsyz taksı júrgizýshisi.