Elorda áýejaıynda jolaýshylar úshin jańa qyzmet túri paıda boldy
NUR-SULTAN. QazAqparat – Nursultan Nazarbaev áýejaıynda ýaqytyn únemdegisi kelgen jolaýshylar úshin «Fast track» atty jańa qyzmet túri iske qosyldy, dep habarlaıdy QazAqparat tilshisi.
«Bul qyzmet túri barlyq halyqaralyq áýejaılarda usynylady, ol kezekte turmaı ýaqytyn únemdegisi kelgen jolaýshylarǵa arnalǵan. Endigi ýaqytta bizdiń áýejaıda kez kelgen jolaýshy aqysyn tólep, qol júgimen Fast track arqyly tekserýden jyldam óte alady. Negizgi júk atalǵan qyzmettiń ishine kirmeıdi, tek qol júgi. Qazirgi ýaqytta Fast track arqyly tirkelý Fly Arystan jáne Qazaq Air áýe kompanııalarynyń jolaýshylary úshin qoljetimdi» , - dedi «Nursultan Nazarbaev halyqaralyq áýejaıy» AQ Basqarma tóraǵasy Ǵabıt Tájimuratov.
Sondaı-aq, áýejaı basshysy basqa áýe kompanııalardyń atalǵan qyzmetke qosylmaý sebebin aıta ketti.
«Basqa áýe kompanııalary jolaýshylardy tirkeý, tekserý qyzmetin óz esepterinen júrgizedi. Sol sebepti men ol basqa áýe kompanııalardyń jolaýshylary aldyn ala kelip tirkelgeni jón», - deıdi ol.
Onyń aıtýynsha, Fast track qyzmeti eresek azamattar úshin 4000 teńge, 12 jasqa deıingi balalar úshin 50 paıyz jeńildik, al 0-den 2 jas aralyǵyndaǵy sábı úshin tegin. Sondaı-aq, erekshe kútimdi qajet etetin jandar úshin de atalǵan qyzmet tegin bolyp tabylady. Jáne jańa qyzmet túri bar-joǵy 3-5 mınýt ýaqytty alady.
