Elorda áýejaıynda Tashkentke 21 myń dollar alyp ushpaq bolǵan jolaýshy ustaldy

NUR-SULTAN. QazAqparat – «Áýejaı-Astana» keden beketiniń qyzmetkerleri «Nur-Sultan-Tashkent» avıareısimen ushatyn jolaýshydan ruqsat etilgen somadan artyq kólemdegi qolma-qol shetel valıýtasyn anyqtady, dep habarlaıdy QazAqparat QR Qarjy mınıstrligine silteme jasap.

«24 mamyr kúni elorda áýejaıynda Nur-Sultan qalasy boıynsha Memlekettik kirister departamenti «Áýejaı-Astana» keden beketiniń qyzmetkerleri UQK sheqara qyzmeti jáne Áýejaı baqylaý qyzmetimen birlese otyryp, «Nur-Sultan-Tashkent» baǵyty boıynsha PN 722 halyqaralyq avıareısimen ushatyn jolaýshylarǵa kedendik baqylaý júrgizgennen keıin atalǵan zań buzýshylyqtyń jolyn kesti», - delingen vedomstvo málimdemesinde.

Jolaýshynyń qoljúgin rentgen arqyly qaraǵannan keıin ol júk bólimine shaqyrtylǵan.

«Tekserý barysynda 21 650 AQSh dollary (9 mln teńge) anyqtaldy. Atalǵan derek boıynsha ákimshilik materıal toltyryldy», - dep tolyqtyrady organ.

Prezıdenttiń «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» bıyl 14 naýryzdaǵy Jarlyǵy boıynsha 10 000 AQSh dollary balamasynan asatyn jáne áketý kúnine belgilengen QR Ulttyq Bankiniń baǵamy boıynsha eseptelgen somadaǵy qolma-qol shetel valıýtasy jáne (nemese) shetel valıýtasyndaǵy aqsha quraldaryn áketýge tyıym salynǵan.

Sondaı-aq, memlekettik kirister departamenti «QR Ulttyq Banki shyǵaratyn 5, 10, 20, 50 jáne 100 gramm affınırlengen altyn quımalaryn jáne «ALTYN BARYS» pen «KÚMIS BARYS» ınvestıtsııalyq monetalaryn, 100 gramnan astam affınırlengen altyndy áketýge tyıym salynǵanyn» qaperge beredi.

Aıta ketsek, buǵan deıin 500 myń AQSh dollaryn shekaradan zańsyz alyp ótpek bolǵan adam ustaldy.