Elorda áýejaıynda Qytaıdan keletin ushaqtar úshin bólek turaq bólindi
«6 qańtar kúngi bas sanıtar dárigerdiń qaýlysy boıynsha barlyq sanıtarlyq-karantındik baqylaý bólimi kúsheıtilgen rejımde jumys isteýde. 26 qańtardan bastap áýejaıdyń medıtsınalyq qyzmetkerleri de bortqa shyǵyp, jolaýshylarda dene qyzýy bar-joǵyn anyqtaıdy. QHR-dan keletin ushaqtar úshin arnaıy 17-turaq bólindi», - deıdi kóliktegi taýarlar men qyzmetterdiń sapasy men qaýipsizdigin baqylaý departamenti áýe kóligindegi sanıtarlyq-karantındik baqylaý bóliminiń basshysy Darııa Ásembaeva.
Ol QHR-dan kelgen jolaýshylardy tekserý barysynda 15 adam aýrýhanaǵa jatqyzylǵanyn aıtty.
«Onyń biri Beıjińnen bolǵan. Beseýi - Úrimshiden, beseýi - Sınıannan jáne ekeýi - Sanıannan kelgen. Qazirgi kezde olardyń jaǵdaıy jaqsy. Eshqaısysynan koronavırýs tabylǵan joq. Biz áýe kompanııalaryna hat joldap, 3 tilde anketa daıyndadyq. Jolaýshylardyń tizimin aýmaqtyq departamentterge jiberip, ol jaqta tekserý jumystary júrgizilip jatyr. Biz tek QHR-dan keletin jolaýshylardy tekseretin 3 baqylaý pýnktin qoıdyq», - deıdi ol.
Sondaı-aq, ol oqshaýlaý bólmesin keńeıtý isi qolǵa alynǵanyn aıtty.
«Mınıstr bergen tapsyrma boıynsha barlyq halyqaralyq áýejaı basshylaryna hat joldadyq. Ol jerde oqshaýlaý bólimi bolýy kerektigin, barlyq qyzmetkerlerdi bir rettik maskamen qamtamasyz etý kerektigin aıttyq», - deıdi ol.