Elorda áýejaıynda qomaqty qarjy jymqyrý isi boıynsha tergeý aıaqtaldy

NUR-SULTAN. QazAqparat – Elorda áýejaıynyń bas býhgalteri 1,7 mlrd teńgeni jymqyrý kúdigine ilikti. Bul týraly QR Sybaılas jemqorlyqqa qarsy is-qımyl agenttiginiń Apparat basshysy Qýanysh Japaqov málim etti, dep habarlaıdy QazAqparat tilshisi.

«Astana» Halyqaralyq áýejaıy» AQ bas býhgalterine qatysty eki jasalǵan qylmys boıynsha tergeýdi aıaqtady. Birinshisi - qarjy-sharýashylyq qyzmetke tekseris júrgizbeý úshin Nur-Sultan qalasynyń Sybaılas jemqorlyqqa qarsy qyzmetiniń laýazymdy tulǵalaryna 16 mln teńge somasynda para berý faktisi boıynsha. Ekinshisi - jumysty naqty oryndamastan, 30-dan astam kompanııanyń esepshottaryna aýdarý arqyly áýejaıdyń 1,7 mlrd teńge somasyndaǵy qarajatyn jymqyrý faktisine qatysty», - dedi Q. Japaqov

Onyń atap ótýinshe, osy is boıynsha is-áreketi uqypsyzdyq retinde tanylǵan «Astana» Halyqaralyq áýejaıy» AQ burynǵy Basqarma tóraǵasyna qatysty is sotqa berildi.

Budan buryn habarlanǵandaı, elordada halyqaralyq áýejaıynyń bas býhgalteri men áýejaıdyń taǵy birneshe qyzmetkeri 1,7 mlrd teńge somasyndaǵy qarajatty jymqyrý faktisi boıynsha tergelip jatqandyǵy málim bolǵan edi .