Elorda áýejaıynda ishki reısterge arnalǵan SIP-zal ashyldy
NUR-SULTAN. QazAqparat – Nur-Sultan Nazarbaev halyqaralyq áýejaıynda Mastercard premıým kartasynyń ıelerine qyzmet kórsetetin jańartylǵan demalys zaly ashyldy, dep habarlaıdy QazAqparat.
Jańartylǵan zaldyń basty ereksheligi Mastercard Kazakhstan seriktestigimen Ortalyq Azııa aýmaǵynda ashylǵan alǵashqy nysan bolýynda. Eki aıǵa sozylǵan jańartý jumystanyń nátıjesinde zaldyń aýmaǵy 629 sharshy metrge keńeıip, bir mezette 50 adam qabyldaı alatyn qyzmet jelisi qalyptasqan.
Zalda tirkelý jáne bagajdy túsirý alańy, bagaj oraý pýnkti, shylym shegetin bólme, balalar zaly men jınalys bólmesi bar. Coffee BOOM meıramhanalar jelisi usynatyn «Fýrshet» júıesindegi tamaqtandyrý qyzmetin SIP-zal jolaýshylarymen birge olardy shyǵaryp salýshy jáne qarsy alýshy adamdar da aqysyn tólep qoldana alady.
«Zaldy jóndeýge 2 aıdaı ýaqyt ketti. Mastercard kompanııasynyń Ortalyq Azııada jasap jatqan birinshi SIP-zaly bolyp otyr. Burynǵy zaldan ereksheligi – jınalys bólmesi jabdyqtaldy. Mastercard zaldary álemniń 210 elinde bar. Býdapesht, Býharest, Máskeý, Vena, Praga, Tbılısı, Batýmı sııaqty týrıstik qalalardyń bárinde ashylǵan. Búginnen bastap bul zalda qyzmet kórsetý bastaıdy», - dedi Nursultan Nazarbaev halyqaralyq áýejaıynyń basqarma tóraǵasy Ǵabıt Tájimuratov.
Nysannyń atqarý dırektory Dáýlet Hamzın SІR-zaldyń aýqymy keńeıip, qyzmet sapasy ózgergenimen, baǵasy ázirge ózgermeıtinin aıtady.
«SIP-zalda shyǵaryp salýshylar men qarsy alýshylarǵa arnalǵan ótkizý júıesi bar. Olar zalǵa kirgen soń qoldaryna preıskýrant beriledi. Sondaǵy baǵa boıynsha zaldyń qyzmetin paıdalanyp, aýqattana alady. Al jolaýshylar osy zal arqyly ushý úshin 15 myń teńge tóleýi kerek. Onyń ishine jolaýshylardy tirkeý, bagajdy oraý jáne túsirý, shylym shegetin bólme, balalar zaly men jınalys bólmesi¸ «fýrshet» júıesindegi tamaqtaný qyzmeti kiredi», - deıdi áýejaıdyń atqarýshy dırektory Dáýlet Hamzın.
Jańartylǵan zalǵa «sóıleıtin áýejaı» tıpindegi LED-ekrandar ornatylǵan. Áýejaıdyń jarnama operatory Arına Rıabýhınanyń aıtýynsha, bul ekrandar elimizdiń kórikti jerlerin jarnamalaý arqyly ishki týrızmdi damytýǵa arnalǵan.
«Bastama aıasynda biz OpenKZ dep atalatyn jobany qoldaýdi jón dep taptyq. Jolaýshylar belgili fotograf Valerıı Aıapovtyń eldegi biregeı oryndardy túsirgen sýretterin QR kod arqyly tamashalaı alady», - dedi Arına Rıabýhına.
