Elorda áýejaıynda «Eır Astana» kompanııasynyń ushaǵy aqaý saldarynan Ábý-Dabı baǵytyna ushpaı qaldy
ASTANA. QazAqparat - Seısenbi kúni, ıaǵnı búgin keshke «Astana-Ábý-Dabı» baǵyty boıynsha EY5893 reısimen ushýy tıis «Eır Astana» kompanııasynyń Boıng-767 ushaǵy elordanyń áýejaıynan ushyp kete almady.
«Ushaq Astana ýaqyty boıynsha saǵat 20:35-te áýege kóterilýi tıis bolatyn, alaıda bir saǵat boıy ony otaldyrý múmkin bolmady. Dvıgatel otalǵandaı shý estilgenimen, salonda artynsha jaryq sónip qaldy. Saǵat 21:40-ta jolaýshylardan ushaqtan túsýlerin ótindi. Qazir biz áýejaıdamyz, bizdi tamaqtandyrdy. Stıýardessalar bort kompıýterleri isten shyǵyp qalǵanyn jetkizdi», - dep habarlady QazAqparat tilshisine jolaýshylardyń biri. Qazirgi sátte 70-ten astam jolaýshy Astana áýejaıynyń kútý zalynda otyr. Áýe kompanııasynyń ókilderiniń aıtýynsha, birneshe saǵattan soń jolaýshylar josparlaǵan baǵyttaryna ushyp kete alady.
