Elorda áýejaıynda boranǵa baılanysty 50 reıs oryndalmaı qaldy
NUR-SULTAN. QazAqparat – Boranǵa baılanysty «Nursultan Nazarbaev» halyqaralyq áýejaıynda 50 reıs oryndalmaı qaldy, dep habarlaıdy QazAqparat tilshisi.
«Aýa raıynyń qolaısyzdyǵyna baılanysty qazirgi ýaqytta 45 reıs keshikti. Onyń ishinde ushyp kelýi tıis reıster sany – 25, ushyp ketýi tıis reıster sany – 20. Sonymen qatar, 50 reıs toqtatyldy. Onyń ishinde 11-i – halyqaralyq baǵyttaǵy reıster», - dep habarlady QazAqparat tilshisine «Nursultan Nazarbaev» halyqaralyq áýejaıynyń baspasóz qyzmetiniń ókili Jeńis Ahmetjanov.
Onyń aıtýynsha, ushý qaýipsizdigin qamtamasyz etý maqsatynda «Nursultan Nazarbaev» halyqaralyq áýejaıynyń áýe aılaǵy túngi saǵat 02.40-tan kúndizgi 14.00-ge deıin jabyq turǵan.
«Ózderińiz biletindeı, boran keshe túnde bastalǵan bolatyn. Toqtatylǵan reıster ishinde búgin de, keshe de oryndalmaı qalǵan reıster bar», - dedi ol.
