Elorda áýejaıynda balaǵat sóılegen jolaýshy reısten túsirildi
NUR-SULTAN. QazAqparat - Kólik polıtseıleri elorda áýejaıynda ákimshilik quqyq buzýshylyq jasaǵan 55 jastaǵy jolaýshyny reısten túsirip aldy, dep habarlaıdy QazAqparat.
«17 mamyr kúni Nur-Sultan qalasy áýejaıyndaǵy Jelilik polıtsııa bóliminiń kezekshi bólimine «Eır-Astana» áýe kompanııasynyń ókilinen habarlama kelip tústi. Onda «Nur-Sultan-Aqtaý» baǵytyndaǵy reıstiń jolaýshylarynyń biriniń masań kúıde ózin dóreki ustap, qoǵamdyq orynda balaǵat sózder aıtqandyǵy atap ótilgen. Tekserý barysynda kólik polıtseıleri Aqtaý qalasynyń 55 jastaǵy turǵynyn anyqtady», - delingen Kóliktegi polıtsııa departamentiniń baspasóz qyzmeti málimetinde.
Atalǵan fakti boıynsha QR ÁQBtK-niń 440 jáne 434 baptary, ıaǵnı, alkogoldik ishimdikterdi ishý nemese qoǵamdyq oryndarǵa mas kúıinde kelý jáne usaq buzaqylyq boıynsha ákimshilik hattamalar toltyryldy.
Nur-Sultan qalalyq Mamandandyrylǵan aýdanaralyq ákimshilik sotynyń sheshimimen tártip buzýshyǵa 10 AEK kóleminde aıyppul salyndy.
«Atalǵan azamat áýe reısteriniń elimizdiń qalalary arasynda jańartylǵannan keıin ákimshilik quqyqbuzýshylyq jasaǵany úshin ushaqtan túsirilgen alǵashqy jolaýshy bolyp otyr», - dep naqtylady kólik polıtseıleri.
Eske sala keteıik, 1 mamyrdan bastap Qazaqstan qalalary arasynda áýereısteriniń ushýy jańartyla bastaǵan bolatyn.
Bıyldyń basynan beri elimizdiń kólik polıtseıleri túrli ákimshilik quqyq buzýshylyqtar úshin 16 873 azamatty ákimshilik jaýapkershilikke tartty. Onyń ishinde alkogoldik ishimdikterdi ishkeni jáne qoǵamdyq oryndarǵa mas kúıinde kelgeni úshin 1631, usaq buzaqylyq jasaǵany úshin 318 adam jazalandy.
