Elorda áýejaıynda Astana sammıtine daıyndyq jumystary júrip jatyr
azannyń 7-si. QazAqparat /Aıdar Ospanalıev/ - Búgin astanalyq aqparat quraldarynyń ókilderi elordadaǵy halyqaralyq áýejaıdyń Eýropadaǵy qaýipsizdik jáne yntymaqtastyq uıymynyń Astanalyq sammıtine daıyndyq sharalarymen tanysty.
Halyqaralyq Astana áýejaıynyń atqarýshy dırektory Aleksandr Bekmurzınniń aıtýynsha, el úkimetiniń arqasynda áýejaıdyń perronyn keńeıtip, ushaqtar turatyn turaqtyń kólemin ulǵaıtýǵa qajetti qarjy bólinip, qazirgi tańda atalmysh sharalar júzege asyrylyp ta úlgerildi. «Biz qazir 22 ushaqqa arnalǵan perron salýdamyz. Burynǵy perronnyń ózi 31 ushaqqa eseptelgen. Sonymen qatar bizde Qorǵanys mınıstrligi men shekara qyzmetiniń perrondary bar. Olardyń barlyǵyna da ushaqtar qoıylady. Jańa salynyp jatqan perronnyń qurylysy qazan aıynyń sońyna deıin aıaqtalady. Sammıt barysynda kóptegen ushaqtar qonady, al biz olarǵa jedeldetilgen túrde qyzmet kórsete alýymyz qajet. Sol úshin biz qazir júkterdi tasymaldaıtyn arnaıy quraldar men ushaqtarǵa arnalǵan avtobaspaldaqtar, avtolıftiler, transporterler sııaqty kóptegen tehnıkalardy satyp alýdamyz. Olardyń jalpy sany qazir 100-den asady. Atalmysh tehnıkalardy satyp alý úshin qajetti kelisimder jasalyp ta qoıyldy. Sondyqtan bul tehnıkalar qazan aıy men qarasha aılary aralyǵynda áýejaıǵa jetkizilip bitedi degen oıdamyn. Biz sonymen qatar áýejaı alańdaryn muz bolyp qatýdan saqtandyratyn arnaıy suıyqtyqtardy da satyp almaqshymyz. Basqasha aıtqanda, biz qazir sammıtke úlken daıyndyq ústindemiz», - dedi atqarýshy dırektor.
Onyń sózine qaraǵanda, áýejaıda joǵary mártebeli meımandardy qabyldaıtyn arnaıy ǵımarat qazir jóndeýden ótkizilýde. Onda shet memleketterdiń resmı ókilderin qabyldanady. «Jóndeý jumystary qarasha aıynda aıaqtalyp qalady degen oıdamyz. Sammıt bastalǵanǵa deıin biz barlyq jumystardy tolyqtaı aıaqtaımyz. Bul baǵyttaǵy jumystarǵa elimizdiń aımaqtaryndaǵy áýejaılardyń qyzmetkerleri de qolushyn sozýda. Jumysshylar qazir barynsha kúsheıtilgen jaǵdaıda jumys júrgizip jatyr», - dedi A.Bekmurzın.
