Elorda áýejaıy tótenshe jaǵdaı rejıminde qalaı jumys istep jatyr
NUR-SULTAN. QazAqparat - Nursultan Nazarbaev halyqaralyq áýejaıynyń jolaýshylar jáne júk tasymaly qyzmetiniń basshysy Qobylandy Kákimov TJ rejıminde áýejaıdyń qalaı jumys istep jatqanyn baıandady, dep habarlaıdy QazAqparat tilshisi.
«Shekaralar jabylyp, karantın rejımi engizilse de, bizdiń áýejaı júk, tranzıttik jáne gýmanıtarlyq reısterdi qabyldap jatyr. Bul áýejaıdyń belgili bir tabys tabýyna, aýyl sharýashylyǵy ónimderin eksporttap, agroónerkásiptik keshendi qoldaýǵa múmkindik beredi. Barlyq reısterdi oryndaýda sanıtarlyq talaptar saqtalady», - dedi spıker tilshilerge bergen suhbatynda.
Onyń aıtýynsha, TJ engizilgen kúnnen beri elordalyq áýejaı 800-den astam tranzıttik reıs qabyldaǵan.
«Kún saıyn áýejaıda 3-4 júk reısteri oryndalady. Bul ushý kestesine baılanysty. Táýlik boıy tranzıttik júk reısterin tartý boıynsha kommertsııalyq jumystar júrgiziledi. Qazaqstan aýmaǵynan ushyp ótetin áýe kompanııalarymen baılanys ornatyldy. Áýe kemelerin qarsy alyp, ushyrý úshin arnaıy sanıtarlyq turaqtar belgilendi», - dep atap ótti áýejaı ókili.
Búgin Qytaıdan medıtsınalyq mamandar kelip, 5 tonna gýmanıtarlyq kómek jetkizildi. Bul - áýejaıǵa qonǵan tórtinshi gýmanıtarlyq kómek.
«Buǵan deıin Birikken Arab Ámirlikterinen kómek kelgen edi. 12 tonnaǵa jýyq gýmanıtarlyq kómek jetkizilip, 20 tonnadan astam aýylsharýashylyq ónimderi eksporttaldy. Áýejaı kún saıyn shyǵyndar men tabysyn eseptep otyr. Kommertsııalyq departament aldaǵy ýaqytta barlyq tsıfrdy jarııalaıdy», - dedi Q. Kákimov.
Sonymen birge, spıker áýejaı qyzmetkerleriniń 70% qashyqtan jumys isteý rejımine aýystyrylǵanyn aıtty.
«Qazirgi ýaqytta áýejaı qyzmetkerleri arasynda eshkim vırýsuqtyrǵan joq. Sebebi, barlyq qyzmetkerler reıske qyzmet kórsetkende karantın talaptaryn saqtaıdy. Reıs pen jolaýshylar kólemi azaıǵandyqtan, ushý-qoný jolaǵy men jolaýshylar termınalyna, avtoturaq pen avtobýs alańdaryna jóndeý jumystary júrip jatyr», - dedi Q. Kákimov.
