Elorda áýejaıy múgedektigi baıqala bermeıtin jolaýshylarǵa qyzmet kórsetedi
NUR-SULTAN. QazAqparat - Elordalyq áýejaı kórinbeıtin múgedektigi bar jolaýshylarǵa qyzmet kórsetedi, dep habarlaıdy QazAqpaarat áýejaıdyń baspasóz qyzmetine silteme jasap.
Nursultan Nazarbaev halyqaralyq áýejaıy aýtıstik spektri buzylǵan jáne mentaldy aýytqýy bar jolaýshylarǵa qyzmet kórsetý boıynsha damyǵan elderdiń ozyq tájirıbesin engizdi.
QR Indýstrııa jáne ınfraqurylymdyq damý mınıstrliginiń azamattyq avıatsııa komıteti, Qazaqstannyń avıatsııalyq ákimshiligi, Nursultan Nazarbaev halyqaralyq áýejaıy, Autism Kazakhstan ulttyq qaýymdastyǵy ózara birlesip jolaýshyny, bagajdy jáne júkti áýe kóligimen tasymaldaý qaǵıdasyna ózgeris engizdi.
«Jobanyń basty maqsaty – erekshe qajettiligi bar jolaýshylar úshin ushý saparyn barynsha jaıly etý. Osylaısha, Nursultan Nazarbaev halyqaralyq áýejaıynda aýtızm, dementsııa, Altsgeımer aýrýy jáne basqa da mentaldyq buzylý sekildi múgedektigi kórinbeıtin jolaýshylar úshin jaǵdaı jasalǵan. Múgedektiktiń bul túri bar adamnyń densaýlyǵynda qandaı da bir shekteýdiń bary baıqalmaıdy, biraq mundaı jolaýshy áýejaı qyzmetkeriniń qosymsha kómegin qajet etedi», delingen habarlamada.
Tıisti kýáligi bolǵan jaǵdaıda osyndaı jolaýshyǵa basym tártippen qyzmet kórsetiledi. Oǵan áýejaıda jasyryn múgedektiktiń halyqaralyq belgisi - sary kúnbaǵys úlgisi bar tıisti lanıardtar (lenta) beriledi. Ol úshin avıabılette kórsetilgen ushyp shyǵý ýaqytynan 48 saǵat buryn qyzmet kórsetýge ótinim berý qajet.
«Lanıard avıatsııalyq qaýipsizdik, tirkeý, sondaı-aq áýejaıda shekara jáne keden qyzmetkerlerine kórinbeıtin múgedektigi bar jolaýshylardy sáıkestendirýge múmkindik beredi (olardy alyp júrý jáne rásimderdi basym tártippen ótý úshin). Áýejaıǵa kelgennen keıin aýtıstik spektri buzylǵan jolaýshynyń alyp júretin adamy arnaıy lanıard alý úshin anyqtama bıýrosyna júgine alady. Qajet bolǵan jaǵdaıda jolaýshy aerovokzalda jáne ushaqqa deıin júrip-turýǵa múgedek arbasyn, sondaı-aq ana men bala bólmesin paıdalana alady», delingen habarlamada.
