Elorda áýejaıy mańyn sý basý qaýpi joq - ákimdik
ASTANA. QazAqparat - Elorda áýejaıy aýmaǵyn sý basý qaýpi joq. Bul týraly búgin Astana ákimdiginiń baspasóz qyzmetinen habarlandy.
Astana qalasy ákiminiń orynbasary Qosman Aıtmuhametovtiń aıtýynsha, qazirgi ýaqytta Maıbalyq kólindegi sý kólemi shamamen 62 mln. tekshe metrdi quraıdy. Maksımaldy kólemi 80 mln. tekshe metrge deıin jetedi. Osy jyldyń naýryzynda Astana qalasynyń ákimdigi Maıbalyq kólinen «Nura-Esil» arnasyna deıingi arnany tazartty.
Qazirgi ýaqytta «Qazgıdromet» RMK men Astana qalasynyń TJD qyzmetkerleri sý basýy múmkin aýmaqty zerdeleý qorytyndysyna sáıkes, 280 mln. tekshe metr kóleminde sý kelýi yqtımal. Onyń bir bóligi sý qoımasyn toltyrýǵa, taǵy bir bóligi keıin Esil ózeniniń arnasyn sanıtarlyq tazalaý maqsatynda paıdalaný úshin qarsy retteýishke túsedi.
Osylaısha, elorda áýejaıy aýmaǵyn sý basý qaýpi joq.
