Elorda áýejaıy qyzmet kórsetýge qanshalyqty daıyn
NUR-SULTAN. QazAqparat – Nursultan Nazarbaev halyqaralyq áýejaıynyń atqarýshy dırektory Dáýlet Hamzın karantınnen keıingi alǵashqy Almatydan ushyp keletin reıske daıyndyq týraly aıtty, dep habarlaıdy QazAqparat tilshisi.
«Áýejaı 30 naýryzda jabyldy, sońǵy jolaýshylar reısine qyzmet kórsettik. Qazir 1 mamyrda Almaty – Nur-Sultan alǵashqy jolaýshylar reısin qarsy alyp jatyrmyz. Biz barlyq qajetti sharalardy jasadyq: áýejaı ǵımaratyna kireberiste arnaıy post qoıyldy jáne teris nátıje kórsetken COVID-19 anyqtamasy bar jolaýshylar ǵana kire alady. Barlyq jolaýshylar tek maskamen jáne qolǵappen kirgizilip jatyr. Áýejaıdyń barlyq jerinde arnaıy qashyqtyq saqtalyp, sanıtaızerler qoıylǵan», - dedi Dáýlet Hamzın áýejaıda jýrnalıstermen kezdesýde.
«Kúnine eki ret tazalaý jumystary júrgizilip, barlyq negizgi oryndar dezınfektsııalanýda. Áýejaı jolaýshylar men reısterge qyzmet kórsetýge daıyn dep esepteımiz. 170 óndiristik personal reısterge qyzmet kórsetip jatyr. Ár aýysymda 40 adam shyǵady», - dedi spıker.
Onyń aıtýynsha, áýejaıdyń jumys istemeýine baılanysty avıatsııalyq jáne avıatsııalyq emes kirister nólge jaqyndap, kásiporyn belgili bir shyǵynǵa ushyraǵan.
«Shyǵynnyń naqty kólemi eseptelip jatyr. Budan bólek, áýejaı sanıtarlyq-epıdemıologııalyq sharalardy qamtamasyz etýge, onyń ishinde qyzmetkerler úshin dezınfektsııalaý quraldaryn, jeke qorǵaný quraldaryn, kostıýmderdi, sanıtaızerlerdi jáne taǵy basqa zattardy satyp alýǵa aıtarlyqtaı qomaqty qarajat jumsaǵan. Karantınge deıin táýligine 200 reıske qyzmet kórsettik. Karantın kezinde ortasha eseppen táýligine 20 reıs boldy. Áýejaı bos turǵan joq. Biz tranzıttik jáne júk reısterin tartý boıynsha kóptegen jumystar atqardyq. Gýmanıtarlyq reısterge qyzmet kórsettik», - dep túıindedi D.Hamzın.
Eske salaıyq, búgin Almaty men elorda arasynda áýe qatynasy jandandy.
Budan bólek, 4 mamyrdan bastap Qazaqstanda birqatar áýe reısteri qaıta iske qosylady.
Avtory: Azamat Syzdyqbaev
