Elorda áýejaıy Eýroodaq sertıfıkatyn aldy

NUR-SULTAN. QazAqparat - Nursultan Nazarbaev halyqaralyq áýejaıy Eýropalyq Odaq elderiniń aýmaǵyna avıatsııalyq júk tasymaldaryn jeńildetilgen uıymdastyrý úshin qajetti shart RA-3 (Regulated Agents Third country) sertıfıkatyn resimdeý protsesin aıaqtady, dep habarlaıdy QazAqparat QR IIDM saıtyna silteme jasap.

Qazirgi ýaqytta Nur-Sultan qalasynyń áýejaıy rastalǵan mártebege ıe Qazaqstandaǵy jalǵyz áýejaı. Bul sertıfıkattyń bolýy avıakompanııalarǵa avıatsııalyq qaýipsizdik bóliginde qandaı da bir shekteýlersiz astanalyq áýe aılaǵynan Eýroodaq elderine júk tasymaldaýǵa múmkindik beredi.
«Shyn máninde, aldyn ala aýdıt kezinde Nursultan Nazarbaev halyqaralyq áýejaıy rásimderiniń sapasy maǵan qatty áser etti. Maǵan áýejaıdyń barlyq qyzmetkerleri arasynda kórinetin «qaýipsizdik mádenıeti» qatty áser etti», - dedi RA-3 sertıfıkattaýyn júrgizgen EO táýelsiz valıdatory.
Bul sertıfıkat elordalyq áýejaıdyń júk termınalynda júkterdi óńdeý protsesi júkterdiń barlyq túri úshin Eýropalyq qaýipsizdik standarttaryna tolyq sáıkes keletindigin rastaıdy.
«RA-3 sertıfıkatsııasyna júk termınaly obektileriniń keshendi aýdıti, avıatsııalyq qaýipsizdik rásimderi, personaldy oqytýmen baılanysty ishki rásimder kirdi. Sonymen qatar, joǵary tehnologııalyq jabdyqtar men bilikti kadrlardyń bolýy aýdıt nátıjelerine oń áser etkenin atap ótkim keledi. RA-3 mártebesiniń bolýy kórinisti tolyǵymen ózgertedi: osy sátten bastap barlyq avıatasymaldaýshylar EO elderine júk tasymaldaý quqyǵyn avtomatty túrde paıdalana alady. Bul kez kelgen (sonyń ishinde Eýropalyq) avıakompanııalarǵa astanalyq áýe qaqpalary arqyly operatsııalardy erkin oryndaýǵa múmkindik beredi», - dedi, «Nursultan Nazarbaev halyqaralyq áýejaıy» AQ Basqarma tóraǵasy Ǵabıt Tájimuratov.