Elorda áýejaıy erteńnen bastap qysqartylǵan kestemen jumys isteıdi
«Nur-Sultan qalasynyń áýejaıynda 15 shilde men 8 tamyz aralyǵynda jergilikti ýaqyt boıynsha 11:00-den 18:00-ge deıin ushyp-qoný jolaǵyna jóndeý jumystaryn júrgizý josparlanyp otyr. Osyǵan baılanysty áýejaıdyń jumys reglamenti ózgeredi», - delingen áýejaıdyń baspasóz qyzmeti taratqan habarlamada.
Ushý qaýipsizdigin qamtamasyz etý maqsatynda mundaı jóndeý jumysy jyl saıyn júrgiziledi. Bıylǵy jumystar týraly sheshim aqpan aıynda qabyldanǵan.
«Áýejaıdyń qysqartylǵan jumys kestesi týraly aqparat áýe kompanııalaryna ýaqtyly jiberildi», - dep tolyqtyrady baspasóz qyzmetinen.
Demek, 15 shilde men 8 tamyz aralyǵyndaǵy reıster kestesine qajetine qaraı ózgerister engiziledi.
Aıta ketsek, búgin Indýstrııa jáne ınfraqurylymdyq damý mınıstrliginiń baspasóz qyzmeti jergilikti atqarýshy organdarǵa Úsharal jáne Úrjar áýejaılaryndaǵy jóndeý jumystaryn tez arada aıaqtaý tapsyrylǵanyn habarlady. Jergilikti atqarýshy organdardyń aqparaty boıynsha, Úsharal áýejaıyn 20 shildede, al Úrjar áýejaıyn tamyz aıynyń bas kezeńinde ashý josparlanyp otyr. Eki áýejaı arqyly sýbsıdııalanǵan reısterdi uıymdastyrý jumystary merziminen buryn aıaqtalǵan. Ol úshin qajetti qarjy bólinip, reısterdi oryndaıtyn avıakompanııalar da anyqtaldy.
