Elorda áýejaıynyń ushý-qoný jolaǵyna kúrdeli jóndeý qashan bastalatyny aıtyldy
Búgin QR Kólik vıtse-mınıstri Talǵat Lastaevtyń tóraǵalyǵymen Astana halyqaralyq áýejaıynda ushý-qoný jolaǵy men áýeaılaqty kúrdeli jóndeýden ótkizý sharasy boıynsha alǵashqy jıyn ótti, dep habarlaıdy Kazinform.
Jıynǵa Qazaqstandaǵy azamattyq avıatsııa salasyndaǵy memlekettik organdardyń basshylary, QR memlekettik kúzet qyzmetiniń jáne Syrtqy ister mınıstrliginiń ókilderi, áýejaıdy basqarýǵa alǵan Terminals Holding, Terminals Astana Airport Management LLP basshylyǵy qatysty.
Qazaqstan úkimetiniń Astana halyqaralyq áýejaıyn basqarýǵa alǵan sheteldik ınvestorǵa qoıǵan birden-bir mańyzdy mindeti – áýejaıdyń ushý-qoný jolaǵyn jaqyn arada kúrdeli jóndeýden ótkizý bolatyn. Astana halyqaralyq áýejaıynyń áýeaılaǵy salynǵannan beri aǵymdaǵy jóndeý jumystarynan ótip keledi. Elorda áýejaıynyń úshý-qoný jolaǵy sońǵy ret byltyr shilde-tamyz aılarynda kúrdeli jóndeýden ótti.
«Halyq tarapynan da, memleket basshysynyń tarapynan da Astana halyqaralyq áýejaıynyń ushý-qoný jolaǵyna qatysty ádil syn bar. Sondyqtan biz úshin elorda áýejaıynyń áýeaılaǵyn tolyqtaı kúrdeli jóndeýden ótkizý asa mańyzdy. Áýeaılaq pen ushý-qoný jolaǵy kúrdeli jóndeýden ótken jaǵdaıda Astana áýejaıynyń tranzıttik potentsıaly artyp, ushý qaýipsizdigi jańa deńgeıge kóteriledi. Júk reısterin kóbirek qabyldaýǵa áýejaıdyń tehnıkalyq múmkindigi artady», - dedi QR Kólik vıtse-mınıstri Talǵat Lastaev.
Abý-Dabıden tikeleı beıneqońyraýǵa shyqqan Terminals Holding kompanııasynyń ókilderi áýeaılaqty kúrdeli jóndeýden ótkizýge qarqyndy daıyndyq júrgizip jatqandaryn jetkizdi. Investorlar qańtar-aqpan aılarynda jobalyq smetalyq qujattamany saralap, aqpan aıynyń sońy men naýryzdyń basynda merdigerdi anyqtaýǵa nıetti. Aldyn ala jospar boıynsha naýryzdyń ortasyna qaraı merdiger Astana qalasyna barlyq resýrsyn jumyldyrýy kerek. Investorlardyń jospary boıynsha aýa raıy qolaısyzdyq týdyrmasa sáýirdiń basyna qaraı áýeaılaqta kúrdeli jóndeý bastalýy qajet.
Aldyn ala jospar boıynsha kúrdeli jóndeý 12 aıǵa sozylady. Alaıda kúrdeli jóndeý kezinde áýejaı jumysyn jalǵastyrady. Ushý jáne qonýǵa kúndizgi mezgilde ǵana shekteý qoıylýy múmkin.
