Elorda áýejaıynda sýyq qarý tapsyrý úshin arnaıy jáshik ornatyldy
ASTANA. KAZINFORM - Keıingi kezderi jolaýshylar arasynda kastet, pyshaq, taıaqsha jáne taǵy basqa sýyq qarýdy anyqtaý derekteri jıilegen.
Mundaı zattardy alyp júrýi qaıtymsyz saldarǵa ákelýi múmkin. Bas prokýratýra málimetinshe, sońǵy 5 jylda osyndaı derektermen 92 adam sottalǵan.
«Zań men Tártip» qaǵıdaty aıasynda Astana qalasynyń Avıatsııalyq kólik prokýratýrasy men Astana qalasynyń áýejaıyndaǵy jelilik polıtsııa bólimi qylmystyń aldyn alýǵa baǵyttalǵan profılaktıkalyq is-sharalar júrgizip jatyr.
– Biz elorda áýejaıynyń aýmaǵynda sýyq qarýdy óz erkimen tapsyrý úshin arnaıy jáshik ornattyq. Qylmystyq kodekstiń 287-babynyń eskertpesine sáıkes, sýyq qarýdy óz erkimen tapsyrǵan adam, eger áreketinde ózge qylmys belgileri bolmasa, qylmystyq jaýaptylyqtan bosatylady. Búgingi kúnde jolaýshylar sýyq qarýdy óz erkimen tapsyrýda. Osylaısha, qylmystyq jazadan qutylý úshin sýyq qarýdy tapsyrýdy usynamyz, - delingen habarlamada.
Aıta keteıik, Petropavlda sýyq qarý kórmesinen tarıhı tulǵalardyń qarý-jaraǵyn kórýge bolady.