Elorda aýasyn lastaýshylar anyqtaldy
ASTANA. QazAqparat - Elordanyń aýasyn negizinen kólik quraldary lastaıdy. Bul týraly búgin Astana qalalyq máslıhatynyń kezekti sessııasynda elorda ákiminiń orynbasary Qosman Aıtmuhametov aıtty, dep habarlaıdy QazAqparat.
«Aýa atmosferasyn negizgi lastaýshylardyń úlesi mynadaı: 53 paıyzy avtokólikterge, 25 paıyzy JES-ke, 17 paıyzy statsıonarlyq jylý kózderine, 5 paıyzy uıymdastyrylmaǵan jylý kózderine tıesili», - dep atap ótti ol.
Elorda ákimi orynbasarynyń aıtýyna qaraǵanda, aýa lastanýyn tejeý maqsatynda kommýnaldyq kásiporyndardyń 854 kólik quraly gazǵa kóshirilgen. Jeke jáne zańdy tulǵalardyń kólikterine gaz balony qurylǵysyn ornatýyna 14 myńnan astam kelisim berilgen. Sonymen qatar qala ákimdigi taksılerdi gazǵa kóshirý týraly arnaıy memorandýmǵa da qol qoıǵan. Jalpy búginde elordada 158 ekotaksı qala turǵyndary men qonaqtaryna qyzmet kórsetedi.
«Aǵymdaǵy jyldyń 9 aıynyń qorytyndysynda Astananyń lastaný ındeksi 4,91 birlikti qurady. Bul lastanýdyń tómengi deńgeıimen saı keledi. Sondaı-aq sýdyń lastanýyn da 2,27 birlikke deıin tómendete aldyq. Qorshaǵan ortany qorǵaý shyǵyndary 45 paıyzǵa artty», - dedi Qosman Aıtmuhambetov.
Sonymen qatar ol aǵymdaǵy jyly elordanyń joldaryn salý baǵytynda atqarylǵan jumystarǵa da toqtaldy.
«2017 jyly uzyndyǵy 23,4 shaqyrymdy quraıtyn 11 kóshe salynyp, 64 shaqyrymdyq 104 kóshege ortasha jóndeý jumystary júrgizildi. Turǵyn úı alaptarynyń 55 kóshesine jol tóseldi. Uly dala eli kóshesi boıynda 2 avtomobıl kópiriniń qurylysy bastaldy. Taǵy 17 kóshe qurylysy júrgizilýde»,- dedi ol.
