Elorda ataýynyń jazylýy ózgeriske ushyraýy múmkin
ASTANA. QazAqparat - Elordanyń jańa ataýy «Nur-Sultan» dep jazylýy múmkin. Mundaı usynys Astana qalalyq máslıhatynyń kezekten tys 46-sessııasynda qabyldandy, dep habarlaıdy QazAqparat tilshisi.
«Keshegi Elbasymyzdyń tarıhı sheshimi Qazaqstannyń qaıta túleýine serpin berip, úlken ózgeristerdiń oryn alýyna jol ashty. Nursultan Nazarbaevtyń san qyrly batyl bastamalarynyń biri búginde óziniń jeke qoltańbasyna aınalǵan elordamyz bolsa kerek. Sondyqtan búgin Prezıdent Qasym-Jomart Toqaev elordamyzdyń atyn onyń bas sáýletshisi QR-nyń tuńǵysh Prezıdenti - Elbasy Nursultan Ábishuly Nazarbaevtyń atymen atap, máńgilik tarıhqa qaldyrýdy usyndy», - dep atap ótti sessııaǵa qatysqan elorda ákimi Baqyt Sultanov.
Sonymen qatar ol elordalyqtar Prezıdent Q.Toqaevtyń qala ataýyn Nursultan dep ataýy usynysyn qoldaıtyndyǵyn basa aıtty.
Osydan keıin máslıhat depýtattary Astana qalasyn Nursultan qalasy dep ataýdy usynysqa salyp biraýyzdan qoldady. Endi máslıhat qala ataýyn «Nur-Sultan» dep jazý týraly usynysty Úkimet pen respýblıkalyq komıssııaǵa jiberip otyr.
