Elorda ataýynyń ózgerýin jaqsylyqqa balap otyrmyz - Asker Pırıev
«Adamzattyń tarıhynda túrli ózgerister bolady. Bizdiń Táýelsiz Qazaqstan jas memleket bolsa da, osynshama az ýaqyttyń ishinde el ishinde de, syrtqy saıasatta da úlken jetistikterge qol jetkizip, ózin tek myqty memleket bolyp qalyptasqan el retinde kórsetip otyr. Eń bastysy, bizdiń Qazaqstan halqy Assambleıasy degen ınstıtýtty atap ótýge bolady. Nege deseńizder, Assambleıa - álemdegi biregeı qoǵamdyq ınstıtýt», - deıdi Asker Pırıev Beıbitshilik jáne Kelisim saraıynda ótken jıynda.
Ol óz sózinde, Qazaqstandy Orta Azııa elderiniń lokomotıv retinde ózge memleketter moıyndap otyrǵanyn atap ótti.
«Bizdiń Elbasynyń salıqaly saıasatynyń arqasynda jetisterdi tanyp, tamsanyp jatqan elder kóp. Azamattardyń bári oǵan kýámiz. Astanamyzdyń taǵdyry solaı: birneshe ret aty ózgerdi. Taǵy da ózgerip jatyr. Elordanyń esiminiń ózgerýin jaqsylyqqa balap otyrmyz. Osynaý kezeńde alǵa umtylý óte kerek boldy. Astana ataýynyń álemdik arenada brend bolyp qalyptasyp qalǵany aıqyn. Elimizdegi qandaı da bolsyn uıymdardyń ataýy da Astanamen baılanysty. Tipti iri álemdik kompanııalar rebrendıng jasaýdy qolǵa alyp jatady. Esterińizde bolsa, LG kompanııasy Goldstar dep atalǵan bolatyn. Budan LG tek utqanyn aıta ketý kerek. Al bul jaǵdaıda biz kommertsııalyq uıym emes, tutastaı, turaqty damyǵan elimizdiń astanasy, Eýrazııanyń júregi týraly aıtyp otyrmyz. Meniń oıymsha, bári zańdy, bári durys. Aldaǵy ýaqytta bizdi bul baǵytta mol jaýapkershilik kútip tur. Álbette, talmaı eńbektený kerek. Ásirese, áleýmettik jelide kóbirek jumys júrgizý kerek. Elordamyzdyń tanymal bola túsýine atsalysqanymyz jón», - deıdi Asker Pırıev.
Eske sala ketsek, osydan birneshe kún buryn Memleket basshysy Qazaqstan Respýblıkasynyń astanasy - Astana qalasyn Qazaqstan Respýblıkasynyń astanasy - Nur-Sultan qalasy dep qaıta ataý týraly jarlyqqa qol qoıǵan bolatyn.
