Elorda ákimdigi órtten mert bolǵan tórt balanyń otbasyna kómek kórsetip jatyr

ASTANA. KAZINFORM – Astanada órtten zardap shekken otbasylarǵa kómek kórsetiledi. Bul týraly ákimdiktiń baspasóz qyzmeti habarlaıdy.

«Shatyry jartylaı opyrylyp, órt bolǵan jeke eki qabatty úıde eki otbasy turǵan. Astana ákimdigi olarǵa qajetti kómek kórsetedi. Balalary qurban bolǵan jáne zardap shekken otbasyǵa psıhologııalyq kómek beriledi. Sonymen qatar materıaldyq, turǵyn úı jáne basqa da qajetti kómek kórsetiledi. Týystaryna qaıǵyra kóńil aıtamyz», - delingen ákimdik taratqan habarlamada. 

Jeke turǵyn úıde turyp jatqan ekinshi otbasy ýaqytsha baspanaǵa kóshirildi. 

«Ákimdik qyzmetkerleri otbasylarymen turaqty baılanysta, barlyq qajetti kómek kórsetiledi», - dep tolyqtyrdy ákimdikten. 

Aıta ketsek, búgin tańerteń Astanada jeke turǵyn úı órtenip, 2011, 2015, 2021 jáne 2022 jyly týǵan tórt bala qaza tapty.